5-6 июльышто Медведево район Руэм посёлкысо ипподромышто XXIV Федеральный Сабантуйым кумдан пайремлыме.
Тушто татар калыкын ятыр модмашыже, таҥасымашыже тӱрлӧ площадкыште эртаралтыныт. А корэш национальный кучедалмаш дене Российысе таҥасымашыш элнан тӱрлӧ кундемже гыч 100 наре спортсмен толын. Ты кучедалмаште абсолютный батыр лӱмым Параньга район Ернур ялын шочшыжо Муса Галлямов сулен, но тудо Татарстан кундемын чапшым арален. Палемдыман, Муса корэш дене ныл гана тӱнямбал чемпион лийын.
Спортсмен деч пошкудо кундемыш кузе логалмыже, корэш дене кунамсек заниматлымыже да моло нергенат мутланышна. Тудо тыгерак палдарыш:
– Мый ялыште шочын-кушшо тыглай рвезе улам. Изинек яндар южышто, верысе икшыве-шамыч дене уремыште шуаралтынам. Моло рвезе семынак спортым йӧратенам, но ялыште профессионально заниматлаш йӧн лийын огыл, садлан шке семын веле шуаралтынам. Корэш спортыш латвич ийым темымеке толынам. Тылеч ончыч имне спортышто вияҥынам, но кушмо семын капкыл нелытем погынен, садлан тудым кодаш логалын.
Ачам – пеҥгыдын йодшо айдеме, рвезе икшыве спорт дене пеҥгыде кылым кучышаш манын, чӱчкыдын ойлен. Садлан имнешке-влак радам гыч кораҥмеке, корэшыште шкем терген ончаш темлен. Тыге мый ты кучедалмаш дене заниматлаш тӱҥалынам.
Марий Элыште корэш кучедалмаш дене ятыр икшыве заниматла. Школышто тунеммем годым Морко, Марий Турек, Параньга районлашке чӱчкыдын таҥасымашыш коштынна. Тыге икте-весым ончен, шукылан тунемынна, сайрак результатым ончыкташ тыршенна. Кушмо семын кугурак ӱчашымашлашке ушнаш тӱҥалынам. Ятыр гана сеҥыше-влак радамыште лийынам. А Сабантуй пайрем, очыни, ик эн йӧратыме да вучымо. Тыште эреак чапле приз дене куандарат. Ты гана Лада гранта автомашина деч сравочым да тагам кучыктышт. Ты машина ынде луымшо лие.
Муса деч «Тынар машинам куш чыкенат? Автопаркым почынат мо?» – манын йодым. Тудо тыге вашештыш:
– Ала-мыняржым лишыл еҥем-шамычлан пӧлекленам, молыжым ужаленам.
М.Галлямов ынде кумшо ий Татарстаныште ешем дене илем мане. Сай паша вер улмылан кӧра тушко каен. Тудын ныл ӱдыр икшыван ача. Нунат спортым йӧратат: икте ияш кумылан, весылан гимнастике келша. Галлямовмыт тений шочмо кундемыш пӧртылаш шонат. Мусан ойлымыж почеш, тудлан тыште паша верым темленыт.
Авторын да И.Речкинын фотожо-влак.