1 сентябрь – кажне еҥын илышыштыже у ошкыл, у тат. Меат кунам-гынат школыш куанен коштынна. А лудшына-влак школ жапым кузерак шарналтат?
Аида Пчёлкина (Декина), Йошкар-Ола:
– Кажне йоча школыш кайыме татым изин-кугун вуча. Мыйын авам-ачам, Валентина Сергеевна ден Павел Никифорович Декинмыт, школышто туныктышылан ыштеныт, сандене мый изинекак авамын туныктымо классысе йоча-влак дене пырля парт коклаште шинченам. Кунамже, шеҥгел партыш вераҥын, нунын семынак возенам, лудаш тӧченам, туныктышын каласкалымыжым колыштынам. 1 сентябрь кечын пакча гыч эн мотор пеледышым кӱрын пуртен, кугу аршашым кучен, икымше туныктышо — Елизавета Васильевна Степанова деке – 24 йоча вашкенна. Морко район, Кумыжъял кыдалаш школым тунем пытаренам. Туныктышем-влакым кызытат порын шарналтем. Акам, Галина Павловна, кызыт шкенан школышто тырша.
Алена Илиева (Петрова), Пурӧ ола:
– Мый икымше классыш Пошкырт кундем Мишкан район Тӧҥгак ялысе тӱҥалтыш школышко каенам. Икымше туныктышына Мария Ивановна Шаптраева лийын. Тудо кум классым шкетак туныктен, сандене мемнан деч пеҥгыдын йодын. Икымше сентябрьым изин-кугун вученам. Пеш кугу событий семын чучын. Икымше партышке шинчынам. Икымше оценкым «5» налынам. Школым поро кумылын шарналтем. Очыни, тӱҥалтыш класслаштак айдемын койыш-шоктышыжо пеҥгыдемаш тӱҥалеш. Туныктышем-влаклан пеш кугу таум ойлем, вуем савем.
Надежда Акиева, Йошкар-Ола:
– Школыш кайыме жапым пеш чот вучем ыле. Ава-ача у наста-влакым наледат. Мый у тетрадьым, ручкам, ранецым, карандашым, у вургем-влакым шке полкышкем оптен шындем да школыш кайыме марте икмыняр гана нуным уэш-пачаш луктын-поген оптем ыле. Тунамсе у вургем-влакын пушыштым кызытат шижам. Ме кеҥеж эртымыланат ойгырен огынал, вет йоча жапыште эре пиалан лийынна, а школыш моткоч чот кайыме шуын. Тӱҥалтыш класслаште мемнам Зоя Аркадьевна туныктен.
Но утларакшым кугурак класслаште тунемме ушеш кодын. Калтаса районысо Киябак кандашияш школ пу пӧртыштӧ верланен ыле, тудым коҥгаш олтен ырыктеныт. Кызыт ты зданий уке, но тошто школ – тачат чоныштем.
Ирина Степанова.
Фото-влакым еш альбом гыч налме.