Яна Абдулина, Пошкырт кундем:
– Мыйын авам Галина Абдулина Пошкырт кундем Мишкан районысо ямле Измар ялеш шочын-кушкын. Тынбай ялыш марлан лектын. Ме ешыштына кум йоча улына. Даяна шӱжарем 9-ше классыште, мый 11-ше классыште, Денис шольым 7-ше классыште тунемына. Эше мемнан Дин изана уло. Тудым 12 ияшыж годым авам ончаш налын. Изана кызыт 29 ияш, пашам ышта.
Авана ныл ият пеле кок вере тыршен: ялысе почтым вуйлатен да сельсоветыште специалист лийын. Авам эн мотор, ныжыл да пашаче. Мастар кидше дене суртышто мом гына огеш ыште! Чыла вере шуэш. Эше тудо вич ӱдырлан – пуртымо ава, 9 уныкалан – кова. Аваем, ме тыйым пеш чот йӧратена!
Эн шерге тый улат!