Советский районышто Солнечный посёлкысо тӱвыра пӧрт пашаж дене чаплана. Тений тудым Марий Элыште ик эн сай тӱвыра пӧртлан шотлымо, кӱкшын аклыме. Клубым вуйлатыше Нина Ивановна Ведерникова тыште ынде 40 ий пашам ышта.
Клуб посёлкын рӱдӧ верыштыже, администраций пелен, кок пачашан зданийыште верланен. Ты кермыч оралтым эше 1965 ийыште чоҥымо улмаш. Ондак тудо офицер клублан шотлалтын. Военный-влак да тыгак нунын ешышт тушко погыненыт, каненыт. Моло клуб дене таҥастарымаште ты оралте районышто ик эн кугулан шотлалтеш. Тыште йоҥгыдо спортзал, концертым ончымо зал, книгагудо, музыкальный школ иктеш верланеныт.
Клубым вуйлатыше Нина Ивановна Ведерникова мемнам куанен, порын вашлие. Ты кундемыште тудо ятыр ий ила, сандене эртыше пагыт нерген шуко каласкалыш, аккордеон почеш сылнын муралтыш. Нина Ивановна – ты районысо Кугунур ялын шочшыжо. 16 ияшак заводышто пашам ышташ тӱҥалын. Мураш йӧратыме кумылжо тӱвыра пашашке конден. 1982 ийыште Солнечный тӱвыра пӧртыштӧ тыршаш тӱҥалын. Кок ий гыч самырык специалистым клубым вуйлатышылан шогалтеныт. Тачат тудо йӧратыме пашажым куанен ышта, верысе калыкым тӱвыра илышлан кумылаҥда.
– Авам тӱҥалтыш класслам туныктен, ачам финансист лийын. Шӱльыдӱр школышто 9-ше классым тунем пытарымеке, йолташ ӱдырем дене пырля Йошкар-Олашке тарванышна. Мый Полуприводниковый прибор заводышто лу ий пашам ыштенам. Тунам спорт дене пеҥгыде кылым кученам. ГТО дене нормативым сдатлымем дене шӧртньӧ значокым налынам, спорт мастерыш кандидат лийынам. Тыгодым мураш-кушташ йӧратенам. Паша деч вара кастене Йошкар-Оласе культпросветучилищыште тунемынам, марий хорыш коштынам.
1981 ийыште шкенан ялысе рвезе Анатолий Фёдорович Ведерниковлан марлан лектынам. Пелашем Украиныште Штурманский гражданский авиаций училищым, варажым Москосо юридический институтым тунем пытарен. Тудо Озаҥыште диспетчерлан ыштен, варажым Йошкар-Оласе аэропортыш куснен. Милицийыште тыршен, майор лийын. Ме коктын кок шочшым ончен куштенна. Чаманаш логалеш, пелашем шукертак илыш дене чеверласен.
Солнечный тӱвыра пӧртыш 26 ияш толынам. Ты кундемыште талантан еҥ-влак илат. Сандене шке йырем чолга пашаеҥ-влакым чумыренам. Кызыт клубышто кумытын тыршена, нунын коклаште ӱдыремат уло. Ме идалык мучко тӱрлӧ пайремым, концертым эртарена. Теве июнь тӱҥалтыште Солнечный посёлкын лӱмгечыжым палемдаш тӱҥалына.
Тений Марий Элыште эн сай тӱвыра пӧрт лӱмым сулымо дене мыланна 102 тӱжем окса премийым кучыктеныт. Тудын дене ме аппаратурым (проекторым, принтерым, ноутбукым, кок радиомикрофоным) налынна.
Ты кундем мыланем моткоч келша. Мотор пӱртӱс лоҥгаште, чодыра коклаште илена, яндар южым шӱлена. Сандене Йошкар-Олашке кайыме огеш шу, – мане Н.Ведерникова.
Солнечный тӱвыра пӧртыштӧ тӱрлӧ коллектив уло. Тушко изижат, кугужат мастарлыкым нӧлташ, мураш-кушташ коштыт. Нина Ивановнан мутшо почеш, йоча коллектив гына нылыт уло. Шуко ансамбльын лӱмжӧ «солнечный» шомак дене кылдалтын. Мутлан, «Солнышко», «Солнечный остров», «Солнечный удар», «Солнечный луч», «Солнечные зори». Тыгодым рушын але марийын веле огыл, тыгак испан, ирлан да вес калыкын моло куштымашыштым шындат. Сеҥымашышт шуко. Нуно районысо, республикысе, тӱнямбалысе конкурслашке чӱчкыдын коштыт да ончыл верыш лектыт.
Кугу спортзалыште жапым пайдалын эртарат, тӱрлӧ спорт модмашке ушнат. Тысе любительский ушем-влак баскетболла, теннисла модыт.
Солнечный тӱвыра пӧртын коллективше пашаште эре сеҥымашыш шуаш тырша. Концертымат сайын эртара, еҥ-влакын кумылыштым налын мошта. Зданийын тошто улмыжо гына изиш тургыжландара да кумылым волта. Нина Ивановнан мутшо почеш, тудым ачалаш 65 млн теҥге кӱлеш. Нацпроектыш пурташ манын, Москош документым колтымо. Но тений але тудым проектыш пуртымо огыл. Тысе пашаеҥ-влак, клубым ачалат да уэмдат манын, моткоч ӱшанен илат. Тунам тудын тӱсшат вашталтеш, пашам ышташат кумыл утыр лиеш.