Шукерте огыл вуз ден ссуз-влак коклаште эртаралтше «Идалыкын студентше» конкурсышто кандаш номинацийыште сеҥыше-влакым палемденыт ыле. «Идалыкын старостыжо» номинацийыште «Юриспруденций» направлений дене МарГУ-што тунемше Таисия Петрова (снимкыште) сеҥен.
3-шо курсышто тунемше студенткыже ынде кумшо ий почела шке группыштыжо старосто. Лач тиде амаллан кӧра тудо саде конкурсышто участвоватлаш шонен пыштен. Да чын ыштен. Вет икымше степенян лауреат лӱмым лач тудо сулен. Лишыл кечылаште,
14-18 ноябрьыште, ТАИСИЯ ПЕТРОВА Ростов-на-Дону олаште республикын чапшым конкурсын федеральный этапыштыже арала.
Т.Петрова Марий Турек район Кӱшыл Мосара ялыште шочын. Ик идалык гыч военный пашам шуктышо ачажлан Йошкар-Олаште пачерым пуэныт. Сандене ешге рӱдолашке илаш кусненыт. Таисия 20-шо №-ан школым тунем пытарен. Тушто ӱдыр ятыр мероприятийыште шкенжын чолгалыкшым, мастарлыкшым ончыктен.
Юрист – серьёзный профессий. Тыгай корным ойырен налше студент-влакланат чолга лияш да тӱрлӧ вере участвоватлаш йӧн уло. Таисия факультетыштат, вузыштат мероприятий-влакым организоватлымаште кугун тырша. «Голос Юности» ден «Студенческая весна» фестивальлаште эре выступатла. Шукыж годым шкенжым иктаж мыскара сценкын режиссёржо семын терга. Тудын йӱкшӧ яндар, сылне муро-влакым мура. Чолга улмыжлан кӧра тений кеҥежым ты вуз гыч Таисиям да эше кум студентым «Волга-Янцзы» российско-китайский форумышко ойырен налыныт.
«Чанша олаште эртыше форум 12 кече шуйнен, – ойла Таисия. – Ты мероприятий тӱняумылымашем вашталтен. Тушеч ятыр пашам шукташ кумылаҥын толынам. Форумышто китай студент-влаклан Российын кечыжым эртаренна. Тунам марий калыкын йӱлаж нергенат каласкаленна. Тыгай форумыш логалмемлан республиклан да вуземлан тауштем. МарГУ-што моло вузласе шке мастарлыкым ончыкташ ятыр конкурс уло, университетнаи шуко йӧным пуышо эл денат таҥастарашат лиеш. Шке шонымашлан ӱшанет гын, сеҥымашлашке шуат!»
«Идалыкын старостыжо» лӱмым налаш ныл студент участвоватлен. Т.Петрова шке студент илышыж нерген моткоч оҥай видеофильмым ямдылен. Тидым жюри эн оҥайлан шотлен.
Кызыт ӱдыр конкурслан кыртмен ямдылалтеш, самопрезентацийым ямдыла, портфолиом иктыш чумыра.