Эн сай пӧлек – мундыра
Звенигово район Торгансола ял ӱдыр Лариса Малышкина чот начарын ужмылан кӧра сокыр да начырын ужшо-влаклан Йошкар-Ола воктенысе Савино школ-интернатыште тунемын.
Ӱдыр изинекак шке шонымашышкыже шуаш тыршыше лийын, сандене аважын кидпашам ыштымыжым ужынат, кузе-гынат тидлан тунемаш шонен пыштен.
– Изиэм годсек курчак-влаклан вургемым ургаш йӧратенам. Куэмын тӱсшым да узоржым ойырен кертынам гын, шӱртым имыш кералаш авамым, ачамым але изамым полшаш йодынам. Но нуным утыжым йыгыжтарымем шуын огыл, сандене тидым шкеак ышташ тунемым. Эн ончыч йылмем дене име рожын куштыла улмыжым тергенам, вара вес могыр гыч шӱртӧ мучашым рожыш виктаренам. Шӱртӧ пурен але укем палаш манын, уэш йылмем дене «онченам». Пурен гын, пӱем дене мучашыжым пурлын, шупшылынам. Варажым мый дечем сайын ужшо-влакланат име рожышко шӱртым тыгела кералаш полшенам. Тувыр-влаклан выкройкым шке шоненам. Кок могырге икгай лийже манын, тудым пелыгыч тодылын, пӱчкын луктынам, – ойла Л.Малышкина.
Ик оҥго почеш весе
Ларисан аваже икшывыже-влаклан шуко вургемым пидын чиктен. Изи ӱдырланат тиде сомыл оҥайла чучын.
– Туныкташ йодмемлан «Тый оҥгым садак от уж» манын вашештен тудо. Но сӧрвален йодмемлан авам туныкташ кӧныш. Имышке оҥгым кузе погаш кӱлмым ончыктен гынат, лицевой оҥгым тӱҥалтыште нигузеат пидын кертын омыл.А вара толашен-толашенак содыки кертым да тугай чот куаненам! Содор авам дек куржынам да тудлан ончыктенам. Авам мыйым мокталтыш. Тулеч вара курчак-шамычлан шарфым да безрукавке-влакым пидаш тӱҥалынам. Тунам 10 ияш лийынам, — умбакыже ойла самырык ӱдырамаш. – Савино школ-интернатыште пидме кружокышто Елена Леонидовна салфетке-влакым пидаш туныктен. Но тыште ик нелылык лийын: схеме-влакым мый шке ужын кертын омыл, сандене туныктышемын каласымыж почеш гына пидынам. Елена Леонидовна тунам кече коден пашашке коштын, сандене ныл радамым пидмеке, пашаш толмыжым чон вургыж вученам. Варажым схеме-влакым йолташ ӱдыр але воспитатель-влак йӱкын ойленыт.
Пидме эн сай тувыр
Савино школ-интернат деч вара ӱдыр Йошкар-Оласе ик вузышто психологлан тунемын.
– Университетыште тунеммем годым йодмо почеш шуко пидынам, тыге изиш оксамат ыштен налынам. Вара эркын-эркын тӱрлӧ конкурсыш ушнаш кумылаҥым. Тушто я мундырам пӧлеклат, я крючок наборым. Пидаш йӧратышылан тиде – эн сай пӧлек. Тыге мый оласе, а вара Российысе конкурслаш ушнаш тӱҥалынам.
Икана пайрем тувыр-влак конкурсышто мыйын пидме вургемем уло Россий гыч пурышо 200 паша коклаште сеҥен. Тунам мылам ик яшлык шергакан шӱртым да пу дене ыштыме пидме имым пӧлекленыт. Тиде спице денак 2015 ийыште Апилимпикс конкурсышто ныл шагат жапыште калпакым пидынам да умбакыже Францийыште эртарыме конкурсыш кайышаш ыльым. Но эргым шочмылан кӧра тушко шым кай.
Тиде конкурсысо пидме эн сай тувыр-влакым ик палыме журналыште савыктеныт. Тидлан кӧра варажым мыйым Сургут олашке мастер-классым эртараш ӱжыныт», – умбакыже каласкала Лариса.
Кидпаша деч посна ӱдыр спорт дене пеҥгыде кылым куча. Штангым нӧлтымаште кок гана тӱнямбал чемпионко лӱмым сулен, Турцийыш, Америкыш, Кечывалвел Корейыш, Китайыш миен.
Пиалан еш
Лариса 2010 ий октябрьыште марлан лектын. Сӱан деч ик тылзе ончыч ӱдырын ушышкыжо вучыдымо шонымаш пурен: сӱан тувырым пидаш. Но тиде жапыштак Турцийыш таҥасымашыш кайыман ыле. Туге гынат Лариса, яра жапым арам эртарен огыл: самолётышто, спортзалыште, тренировко коклаште але таҥасымаш деч вара – эре пидын. Тыге тудо илышыштыже эн пиалан кечын кружеван мотор ош платьым чиен шогалын.
Лу ий ончыч Лариса пелашыж дене пырля Москошко илаш куснен. Кызыт тудо кок йоча дене мӧҥгыштӧ шинча. Яра жапыште соцкылысе лаштыкым «вӱда», шке илышыж гыч оҥай шонымаш-влакым воза. Каныш кечылаште пелашыже да эргыж-влак дене, велотандемышке (кок еҥлан йӧнештарыме велосипед) шинчын, воктенысе вершӧрым шымлат.
Таза еҥ-влак коклаште илышлан ӧпкелалтме нерген чӱчкыдын колаш логалеш. Тыгодым начар тазалыкан еҥ-влак илен лекме кажне кечылан тауштат. Нуно йырваш улшо сӧраллыкым, айдеме коклаште вашкылым сайынрак шижын моштат.
