Индийын Касвел Бенгалий штатыштыже илыше россиянке-влак «Didi №1» телевизионный конкурсышто мастарлыкыштым ончыктеныт.
Кумытын Россий гыч лийыныт, а икте – Армений гыч. Нунын кокла гыч иктыже Волжский район ӱдыр – Анна Саха (шола гыч икымше), а Анжелика Ден тукымжо Шернур район гыч.
«Didi №1» конкурс озавате-влаклан эртаралтеш. Ты программыш вес элла гыч толшо еҥ-влакым чӱчкыдын ӱжыт, но кум россиянкым иканаште – икымше гана. Сеҥышыш Анжелика Де лектын. Ӱдырамашын аваже – марий, Шернур район гыч, а ачаже – индус. Анна Саха программе мучко ончылно каен, но сеҥышыш лектын огыл. Тудо мыланна тыге возен колтен: – Тышке мыйым палыме гоч ӱжыныт. Вара мый шкежат кок еҥым ӱжынам. Бенгал йылмым палем гынат, садак тургыжланенам. А шке нерген палдарыме годым марла ойленам. Конкурсышто тӱрлӧ йыжыҥ лийын. Икымше конкурсышто палыме актёр ӱмбак шар-влакым кышкаш кӱлын. Тыгак индийский лепошкам ыштенна, муро-влакым пален налаш тыршенна. Эн пытартыш этапыште йодышлан вашмутым пуыман ыле. Мый чыла этапыштат эн шуко баллым погенам, но пытартыш йодышлан вашештымым шотыш налын, сеҥышым ойыреныт. Сандене Анжелика «Эн сай озавате» лӱмым сулен. Съёмко деч ончычак марла муренам, чолга койышым ончыктенам. Садлан мыйым икымше номер почеш шогалтеныт. А программе тӱҥалмеке, икымше улмемлан ӧрмалгенам. Туге гынат тиде – мыланем кугу сеҥымаш да опыт.