1 октябрьыште Марий Элыште эртаралтше «Идалыкын студентше-2021» национальный премийын лауреатше-влакым Самырык-влаклан полатыште саламленыт.
Республикыштына тыгай премийым налшаш верч конкурс нылымше гана лийын. Тушто студент-влак 10 тӱрлӧ – вич командный да вич посна – номинацийлаште участвоватленыт.
Тыгай таҥасымашыш сайын тунемше, ты але вес сферыште сеҥымашыш шушо, тыгак ушем-влакын еҥышт гына ушнен кертыныт. Чылаже 32 йодмаш пурен. 20 да 23 сентябрьыште конкурсант-влак, жюри член-влак деке иктын-иктын пурен, шке презентацийыштым араленыт.
«Шулдыран пагыт» лаштык «Идалыкын интеллектше» номинацийыште сеҥыше Юлия Рокина (снимкыште) нерген каласкала.
