6 февральыште МарГУ-што «Мисс МарГУ-2024» конкурсыш ушнышо-влаклан кастинг эртаралтын. 6 мартыште ты конкурсын финалже лиеш.
Тыште уш-акылым тергыме, моторлыкым ончыктымо, усталык паша да спорт дене кылдалтше конкурс-влак лийыт.
Кастинг шотышто МарГУ-со тӱвыра, усталык паша рӱдерым вуйлатыше Я.Г.Семенова кумдан палдарыш:
– Тушко вузысо кажне факультет ден институт гыч ик ӱдыр дене, тыгак йот студентке-влак ушнат. Кастингыште 15 ӱдыр мастарлыкшым ончыктен. Тушто нуно шкешт нерген моторын каласкаленыт, дефилем тӱшкан ончыктеныт. Ӱдыр-влакын сценыште кӱкшӧ таганан туфльо дене коштын моштымыштым тергенна.
Ик тылзыште участнице-влаклан тӱрлӧ мастер-классым, конкурсым эртарена, тыгак пресс-конференций лиеш.
Финалыште нуно видеовизиткым, усталык номерым ямдылышаш, тыгак икмыняр дефилем ончыктышаш улыт.