7 мартыште Йошкар-Оласе Сеҥымашын XXX идалыкше лӱмеш тӱвыра полатыште республик кӱкшытан «А ну-ка, ӱдыр-влак!» конкурсын финалже лийын. Тушто 15 участнице таҥасен. Гран-прим сулышо Татьяна Галкина Советский районын чапшым арален. Тудо Советский посёлкысо йоча сымыктыш школышто туныкта.
Тылеч ончыч ӱдыр-шамыч районысо йыжыҥыште таҥасеныт да сеҥышыш лектыныт. Мероприятийым почмо годым Марий Эл Правительстве Председательын алмаштышыже – тӱвыра, печать да калык-влакын пашашт шотышто министр К.А.Иванов нуным саламлен да кундемнан чын, мотор ӱдыржӧ-влак улыт манын палемден.
Константин Анатольевич Иванов жюрин председательже лийын. Тыгак ӱдыр-шамычым «Защитники Отечества» кугыжаныш фондын Марий Элысе филиалжым вуйлатыше Р.З.Магсумов, «Марий Эл» кугыжаныш куштышо ансамбльын художественный вуйлатышыже А.П.Селиванов, М.Шкетан лӱмеш марий драмтеатрын режиссёржо А.А.Ямаев, «Йошкар-Ола» округын депутатше, СВО-н ветеранже Г.В.Кузнецов акленыт.
Конкурсантке -влак шкеныштым кӱкшын ончыктеныт. Нунын коклаште тӱрлӧ профессийыште тыршыше-шамыч лийыныт. Шке пашашт нерген ӱдырвлак «Мый да мыйын профессием» номинацийыште палдареныт. Тидлан паша кече кузе эртыме шотышто видеопрезентацийым ямдыленыт. «Модо тӱняште да тулаҥше фантазий» номинаций годым нуно шке вургем коллекцийыштым ончыктеныт. Кажныжын тудо ойыртемалтше, мотор лийын. Тыгак «Эрудит», усталыкым ончыктышо номинаций-влакым эскераш куанле ыле. Кажне ӱдыр, чынжымак, пеледыш гай.
Жюриште улшо пӧръеҥшамычлан, очыни, тыгай пеледыш-влак коклаште эн-энжым ойыраш куштылгыжак лийын огыл. Конкурсын «Профессионал» лӱмжым, Гран-прим Советский посёлкысо Йоча сымыктыш школын туныктышыжо Татьяна Валерьевна Галкина сулен. Тудлан марий сӧрастарышым да шке кид дене тӱрлымӧ шовычым К.Иванов кучыктен.
Тыгак кажне ӱдырым тӱрлӧ номинацийыште палемденыт. Тыге «эн сымыстарыше» участнице семын Медведево район гыч Марта Ягодаровам ойыреныт. А «эн эрудированный» ӱдыр Курыкмарий район гыч Елена Гаранина лийын. Оршанке район гыч Лариса Старыгина «креативность», У Торъял район гыч Светлана Чемекова «загадочность», Йошкар-Ола гыч Ольга Шамова «эн чевер», Волжский район гыч Наталья Васильева «артист койышан», Морко район гыч Марина Жолобова «эн чатката», Марий Турек район гыч Марина Алексеева «позитив», Звенигово район гыч Светлана Степанова «элегантность», Параньга район гыч Юлия Петрова «стиль», Килемар район гыч Мария Хлебникова «вий», Шернур район гыч Ольга Элембаева «эн тыматле», Кужэҥер район гыч Ирина Сорокина «шошо», Юрино район гыч Надежда Путилова «шкешотан» лӱм дене суапландаралтыныт. Ончаш толшо-шамычын кумылыштым савырыше призым Марий Турек район гыч Марина Алексеевалан пуэныт.
Калык усталык рӱдерын директоржо Эльвира КУКЛИНА палдара:
– 1970-1980 ийлаште «А ну-ка, девушки!» телепередаче ончыкталтын. Тудын тӱҥ шонымашыже – ӱдырамашым профессийыште чапландарымаш. Ӱмаште Российын Президентше Владимир Владимирович Путин «А ну-ка, девушки!» конкурсым элна мучко угыч эртараш темлен. Марий Эл ӧрдыжеш кодын огыл. Ӱмаште конкурсым эртарыме нерген увертаренна, йодмашым погенна. Ончыч районлаште эн чолга, эн мотор, шке пашаште профессионал ӱдырамаш-влакым ойыреныт. А 7 мартыште республик кӱкшытыштӧ 15 участнице мастарлыкшым ончыктен. Чаманен каласыман, Козьмодемьянск ден Волжск олала гыч участник-влак лийын огытыл. Кажне ӱдыр тӱжвал сынже дене веле огыл, чон моторлыкшо дене жюрим сымыстарен. Воспитатель, туныктышо, медпашаеҥ, администрацийым вуйлатыше да моло профессиян участницевлак уш-акылыштым, уста улмыштым ончыктеныт, ойырен налме профессийышт нерген палдареныт.
«А ну-ка, ӱдыр-влак!» конкурсым поро йӱлаш пуртынена. Да вес ийынат эртараш шонена.
Елена ГОДУНОВА ден Анастасия МИХАЙЛОВА ямдыленыт.
Фото: Калык усталык рӱдерын ВК-се тӱшкаж гыч.