Сентябрьыште кундемыштына «Российын ӱшанже: эн чапле спортшкол» национальный спорт премийын регионысо йыжыҥже эртен. Тудын организаторжо – РФ Спорт министерстве. Конкурс физкультур, спорт аланыште тыршыше специалист-влакын профессионал пашаштым кӱшкӧ нӧлташ полшымо амал дене эртаралтеш.
Тушко ешартыш шинчымашым пуышо спортшкол-влак ушненыт. Тыге регионысо йыжыҥыште икымше вер дене Марий Элысе олимпийский резервын «Виктория» спортшколжо суапландаралтын, кокымшо вер дене республикысе олимпийский резервын ийме спорт дене школжо палемдалтын, кумшо верыш республикысе дзюдо дене спорт школ лектын.
Национальный премийын Российысе йыжыҥже октябрь-ноябрьыште лиеш. Тушто элыштына ешартыш шинчымашым пуышо эн чапле спорт школын лӱмжӧ пале лиеш.
Интернет гыч налме фото.