Кызыт айдемын кушко миен-коштмыжым, канышым кузе эртарымыжым Интернет лаштыкла гыч палаш лиеш. Ондак самырык еҥ-влак гына соцкылыш чыла вераҥденыт гын, ынде кугурак-влакат тиде пашалан тунем шуыныт. Интернетыште кӱлешан ой-каҥаш-шамычым, оҥай еҥ-влакым муаш лиеш. Иктыже – тачысе геройна Ольга Павлова. Тудын лаштыкыштыже мом гына от верешт!..
Оля Мурманск областьысе Североморск олаште шочын. Аваже Любовь Венедиктовна – туныктышо, ачаже Богдан Александрович – военный. Военный-влакым я ик вере, я вес вере колтат, сандене нуно элнан тӱрлӧ олаштыже иленыт. Ольган школыш кайымыж деч ончыч аважын шочмо ялышкыже, Волжский район Ӱлыл Азъялыш, илаш толыныт. Тыштак ӱдыр кушкын. Кӱшыл Азъял школышто тӱҥалтыш класслам тунемын, 5-9- ше класслам – Йошкар-Оласе 24-ше номеран школышто. Умбакыже Йошкар-Оласе технологический колледжыште конструктор-модельер профессийым налын, тыгак МарГУ-што технологий урокым туныктышылан тунем лектын.
Вара Волжск оласе йочасадыш воспитательлан пашаш пурен. Кызыт изирак ӱдыржӧ дене мӧҥгыштӧ шинча. Киралан ик ият индеш тылзе, а Викалан – лу ий. Лишыл жапыште пашаш лекташ шона.
Ольган творческий шӱлышан улмыжо изиж годымак палдырнен, арам огыл тудо Ӱлыл Азъял клуб пеленысе ансамбльыш мураш-кушташ коштын.
О.Павлова ончыкылык профессийымат кидпаша дене кылдалтшым ойырен налын. Ондак шкалан да палыме-влаклан пидын гын, кызыт икшывыж-влаклан вургемым пидеш, урга. Йодшо-влакымат Ольга куандараш тырша.
Мастар еҥ чылалан мастар манын ойлат. Тиде ой дене мыят келшем. Пидме да ургымо деч посна О.Павлова киндым шке пышта, сырым шолта, емыжсаскам кушта.
– Тений ялыште ковамын сад-пакчаштыже пакчасаскам шындаш тӱҥалынам. Тушко вич ий нигӧ коштын огыл. Ынде мый тиде мландым даче семын кучем. Пӧртым эрыктен, ачален шынденна. Кеҥежым ялыште илена, телым – олаште. Емыж-саскам ончен куштымаш – мыйын икымше опытем. Ачам дене кугу теплицым чоҥенна. Мӧрым, эҥыжым, шемэҥыжым , пареҥгым, кешырым, ковыштам, киярым да молымат шынденна. Вес ийлан планна эшеат кугу. Тыгак кӱркам, пулдырчым ашнем. Ешемым шке ончен куштымо пакчасаска дене сийлаш йӧратем, – каласкалыш О.Павлова.
Ӱдырын альбомжо гыч налме фото-влак.
Умбакыже 11 декабрьыште лекше номерыште лудын кертыда. Тыгак интернет-кевытыште налаш йӧн уло.
