Марий Элым Вуйлатышын мутшо почеш, СВО-што лийше военнослужащий-влаклан кӱлешан медицине полыш черет деч посна да яра пуалтшаш.
«Мемнан салтакна-влак шотышто тыгай ошкыл кӱлешан, поснак – отпускыш толмекышт, медицине полышым налмышт годым. Ты шотышто йодмаш-влакат лийыныт. Тидым кызытак решатлыман», – каласен Юрий Зайцев.
Республикын тазалыкым аралыме министрже М.Панькова увертарен: СВО-н участникше-влаклан, отпускыш толмекышт, икымше медико-санитарный полышым пуымо, диспансеризацийым да профосмотрым эртыме, пӱйым эмлыме да лукмо, пудий энцефалит да столбняк деч вакциным ыштыме шотышто «яра ужар коридор» пуалтеш. Тылеч вара ешарен: эртыше пайрем кечылаште медорганизацийлашке ныл еҥ миен. Неле черым мумо огыл.
Марина Панькован мутшо почеш, республикын Тазалыкым аралыме министерствыж ден Военный комиссариат СВО-н участникше-влаклан памяткым ямдыленыт, тушто черет деч посна пуымо чыла медицине полыш ончыкталтын. Нине памятке-влакым олаласе да районласе Военный комиссариатлаште отпускыш толшо салтак-влаклан пуат.