Йоча-влакым аралыме тӱнямбал кечын Марий Элым Вуйлатыше Ю.Зайцев Йоча-влаклан республикысе клинический эмлымверыште лийын.
Тудо эн ончыч стационарын реабилитаций отделенийжын пашажым ончалын.
«Оптимальная для восстановления здоровья медицинская реабилитация» федеральный проект почеш 2023 ийыште нейрореабилитационный отделенийлан 50,5 млн наре теҥгеаш 127 медицинский изделийым налме. Тыгак – тӱрлӧ тренажёрым, йоллан келыштарыме реабилитаций системым, куржталаш дорожкым.
Тений апрельыште инфекций корпусым чоҥаш тӱҥалыныт. Стационарын оралтыжым 1963 ийыштак чоҥымо, тидын шотышто калык деч вуйшиймаш-влак чӱчкыдын пурат. Ты объектым чоҥымо шотышто йодышым Ю.Зайцев ик гана огыл федеральный кӱкшытыштӧ тарватен. Йоча-влаклан республикысе клинический эмлымверыште инфекционный корпусым чоҥаш федеральный бюджет гыч субсидийым ойырымо нерген ойпидышым Российысе Тазалыкым аралыме министерстве дене ӱмаште декабрьыште ыштыме. Бюджетный ассигнованийын тичмаш кугытшо – 783 млн наре теҥге.
Проект почеш 5 пачашан оралтым чоҥышаш улыт, тушто 76 койкылан вер лийшаш. Пашам 2026 ий 30 сентябрьыште мучашлаш палемдыме.
Марий Элым Вуйлатышын пресс-службыжын фотожо.