Евгений Иванов шукерте огыл 24 ийым темен. Морко район Унчо селан шочшыжо, СВО тӱҥалмеке, икымше кечылаштак шочмо элна верч шогышо салтак-влак радамыш ушнаш шонен пыштен. Рвезе кызытат – военный операций кайыме верыште.
Селасе школышто индеш классым тунеммеке, Женя Морко посёлкысо Аграрно-технологический техникумышто чоҥымо паша мастер специальностьым налын. А вара – срочный службо, РФ национальный гвардийын войскаштыже порысым шуктен. СВО тӱҥалме жаплан рвезе Москошто пашам ыштен. Россий Обороно министерстве дене контрактым подписатлен, 2022 ий июльышто тудо марий батальон дене пырля элнам аралаш каен. Ончыч Угарман кундемыште ик тылзе учебкым эртымеке, Е.Ивановын служитлыме взводшо ДНР-ысе Волноваха ола воктеке логалын.
– Мемнам ола воктенысе корно пелен кушшо чодыра тӱреш коденыт. Чыла шке шинча дене ужмеке да чон вошт колтымеке, кум кече шинчавӱд шкеак йоген. Мыланна шкем аралаш изирак землянкым кӱнчаш кӱштеныт. Иктаж ик метр келгытан да тынарак лопкытан лакым ыштенна. Тушеч лекде гыч иленна, манаш лиеш – илыше коднет гын, чытет. Йӱран игече годым тушко вӱд темеш ыле, эрвелеш юалге юж капым кылмыктен. Пелен мом кондымо, тудым кочмо.
Задачына – корным контролироватлаш, Украина могырым саргурал да моло боеприпасым шупшыктымым чарышаш улына ыле. Вара Угледар олаш кусарышт. Туштат корно воктенысе чодыра полосаште тушман ваштареш шогенна, ончыко каяшыже чаракым ыштенна, – каласкала Е.Иванов.
Взводыштышт чылан марий лийыныт, садлан раций дене икте-весышт дене кылым кучымо годым шочмо йылме дене мутланеныт. Тидлан командирышт салтак-влакым эре моктен, вет тыге тушман, кутырымыштым колышт кертын гынат, умылен огыл.
Женямытын взводыштым ик вер гыч весыш кажне арнян гаяк кусаркаленыт. ЛНР-ысе Кременная ола воктене 2022 ий 12 ноябрьыште рвезе сусырген. Тиде ола воктенысе электроподстанцийым штурмоватлыме годым лийын, шола вачышкыже осколко логалын. Тиде жапыште, сусыргышо боевой йолташыжым сӧй пасу гыч шӱдырен лукшыжла, Евгений шкежат вуйушым йомдарен йӧралтын. Лӱддымылыкым ончыктымыжлан Е.Ивановым IV степенян Георгиевский ырес дене палемденыт.
Эмлалтмеке да реабилитацийым эртымеке, ик ий гыч рвезе уэш СВО-ш каен. Ынде взводышт Бахмут олаште задачым шукта. Тений февральыште Женя мӧҥгыжӧ отпуск жаплан толын каен. «За храбрость» II степенян медаль дене наградитленыт да апрельыште ик жаплан мӧҥгыжӧ колтеныт ыле.
СВО-што лийме, тусо шучко сӱретым ужмо рвезым чыла шотыштат пеҥгыдыракым ыштен. Тидлан тунем шуаш ок лий, но нимом от ыште: эл йодеш, ӧрдыжеш от код. Е.Иванов шке илышыжым ончыкыжымат контракт почеш службо дене кылдаш шонен пыштен. Мӧҥгыштӧ тудым аваж ден шӱжарже чон вургыж вучат, тудын верч тургыжланат.
Е.Ивановын альбомжо гыч налме фото.