Россий Обороно министерстве дене контрактым подписатлыше да специальный военный операцийыш каяш кумылан еҥ-влак Марий Элыште шагалын огытыл. Россий Вооружённый Вийыште служитлаш еҥ-шамычым ойырен налме шотышто кугу паша ышталтеш. Контракт почеш военный службыш ойырен налме Йошкар-Оласе пункт гыч, мутлан, еҥ-влакым туныктымо рӱдерлаш да соединенийлаш арняште икмыняр гана колтат.
Ошкыл почеш – ошкыл
Оласе пунктыш миен, кумылан еҥ-влак контрактым подписатлаш шонымышт нерген палдарат. Да нунылан икте почеш вес процедур-влакым эртыман.
Эн ончыч – медицине могырым комплексный тергымашым. Тазалык шотышто чарак уке гын, кандидатлан службо, оксам тӱлымӧ, тыгак льгото да федеральный ден регионысо социальный гарантий нерген каласкалат. Страхований, ик гана тӱлымӧ выплате, ешлан полыш нерген йодыш-влакым поснак тӱткын лончылат. Марий Элыште гын боец-влаклан да нунын ешыштлан 50 наре тӱрлӧ соцполыш пуалтеш.
Умылтарат, полшат
Выплате-влак нерген Йошкар-Оласе пунктын офицерже, лейтенант Антон Сычёв каласкала:
– Кугыжаныш могырым полышым ончалаш гын, ик гана тӱлыман федеральный выплате – 400 тӱжем теҥге, Марий Эл Правительстве 2,6 миллион теҥгем тӱла. Эше ик социальный гарантий – 10 млн теҥге марте парымым списатлымаш. Контрактым 18-65 ияш кумылан еҥ подписатлен кертеш. Военный специальность уке гын, туныкташ колтат.
Ойырен налме пунктын пашаеҥже-влак кандидат-шамычын личный данныйыштым базыш пуртат, дактилоскопийым (кид да парня палым кодат) эртарат да персональный электронный картым кучыктат. Тыгай картым вес семынже электронный военный билет манаш лиеш. Тушко чыла пурталтеш: биометрический данный-влак, кид да парня пале, паспортный данный, личный номер. Ты картым контрактник пеленже войсковой частьыш налеш. Тылеч посна жетоным пуат, тудат шкешотан военный билет, но цифровой вариантыште.
Пунктыштак суд пристав службын пашаеҥже-влак пашам ыштат – кандидатын парымже улмым тергат. Тыгайже уло гын, пӧръеҥ ӱмбач парымым кораҥдат.
А банк организацийын пашаеҥже кандидатлан консультацийым эртара – финанс документым оформитлыме, лицевой счётым почмо да окса выплатым налаш банк картым ямдылыме дене полышым пуат.
Контрактым ыштымеке, военнослужащий-влакым туныктымо рӱдерлаш ямдылалтмашке колтат. Пӧръеҥын боевой опытшым шотыш налын, боевой подготовко программым келыштарат.
Волгоград область гыч 28 ияш Антон Радченко Йошкар-Оласе контракт почеш военный службыш ойырен налме пунктышто Россий Обороно министерстве дене контрактым подписатлен.
– Шке жапыштыже юж-десант войскаште служитленам, боевой десант машинан механик-водительже лийынам.
Специальный военный операцийыште кызыт изам шке порысшым шукта. Ятыр йолташем Шочмо элна верч кредалеш. Адакшым ачамын ончычсо кугу шонымашыже – ме, эргыже-влак, военный лияш. Тудат шке жапыштыже Афган сарыште кредалын. Чӱчӱэм, боевой офицер, Чечнясе кок военный кампанийыште лийын, Бесланыште школым утарымаште лӱддымылыкшым ончыктен. 86 ияш кочамат юж-десант войскаште порысшым шуктен. Мыят ӧрдыжтӧ кодын ом керт.
СВО-што улшо йолташем-влак дене кылым эре кучем, мо-кузем умылен налам, йодыштам. Неле гынат, рвезе-влак вуйым огыт ший.
Авам тыгай ошкылым ыштымемлан ик мутымат тореш ойлен огыл, вет умыла да пала: вес семын лийын ок керт. Палем, тудо ойгыра, но мыланем шке шижмашыжым ончыкташ ок тырше. Шкеже ом лӱд, но кӧргыштем изирак тургыжланымаш уло, – ойла Антон Радченко.
Волгоград область гычак контрактым подписатлыше эше ик еҥ – Владимир Кушнир. Тудат юж-десант войскаште служитлен. Тылеч вара кок ийлан контрактым подписатлен. Но, мӧҥгӧ пӧртылмекыже, гражданский илышыште шке вержым муын огылат, СВО-ш каяш кумылаҥын. Владимирынат тушто ятыр йолташыже, палымыже-влак кредалыт.
– Десантник улам, Шочмо эллан полшаш кӱлеш гын, кузе ӧрдыжеш кодам? Адакшым тушто улшо йолташем-влакын шинчашкышт вара кузе ончаш тӱҥалам? Ача-авамлан мыйым умылымыштлан таум ойлем. «Ит кай. Тушто мом йомдаренат?» манын, ик ганат чарен огытыл, – манеш Владимир Кушнир.
Контрактым подписатлыме шотышто лекше йодышым 8 (836) 272-21-99, 8(993) 389-68-30 номеран телефон дене але 8 800 444 11 47, 147 «шокшо линийыш» йыҥгыртен рашемдаш лиеш. Адрес: Йошкар-Ола, Соловьев урем, 36-шо №-ан пӧрт.