Октябрь мучаште Москошто «СнегоWeek» форум годым «Снегурка – Краса – 2022» конкурсым иктешленыт. Марий Элын чапшым тушто вӱдышӧ, Лумӱдыр семын ятыр ий пашам ыштыше Карина Карнавская арален.
«СнегоWeek» – тӱнямбал кӱкшытан форум. Тудо элнан эн чолга, чулым, профессионал вӱдышыжӧ-влакым иквереш чумыра. Тений тушко Российын тӱрлӧ олаж гыч участник-влак миеныт. Форумышто Йӱштӧ Кугыза ден Лумӱдырын тазалыкыштым вияҥдымылан, тӱжвал тӱсыштым аралымылан тӱткыш ойыралтын. Вет декабрьыште нунылан поснак чот пашам ышташ логалеш. Участник-влаклан тылеч посна пайдале площадке-влак пашам ыштеныт. Тидын годым У ий йӱдым сӧрастарыше диджей-влакланат икмыняр урокым эртареныт. Площадкылаште кызытсе илышлан келыштаралтше йӧным кучылтын, у технологий-влаклан эҥертен, урок-влакым эртареныт. Ты форум годым кажне ийын у шӱдыр чӱкталтеш: элнан эн мотор Лумӱдыржӧ ойыралтеш. Конкурсыш 250 йодмаш пурен. Тушеч жюрин ойырымыжо да йӱклымыжо почеш 25 ӱдырым полуфиналыш налыныт. Финалыш индешын веле логалыныт. Нунын коклаште – Карина Карнавская.
– Организатор-влак конкурсыш ушнаш темлымаш дене мый декем лектыныт. Шуко шонкален омыл, вет Лумӱдыр семын ынде лу ий наре йоча-влакым куандарем. Но конкурсышто шке нергенем веле огыл, тыгак шочмо республикем дене палдарышаш улам ыле. Садлан эн ончыч костюмым ургаш, кокошникым ямдылаш мастар-влакым кычалынам.
Финалыш логалше участник-влаклан шке да республик нерген видеороликым ямдылаш кӱлын. Тидлан мыланем ятыр еҥ полшен. Тӱрлӧ организацийыш лекташ кӱлын, нунат шке поро кумылыштым ончыктеныт, – палдарыш Карина.
Сценыште дефилем ончыкташ кӱлын. Тыгак интервьюм, зритель-влак дене интерактивный программым эртареныт. Тунамак ончаш толшо-влак коклаште соцсетьысе тӱрлӧ площадке гоч йӱклымашым эртареныт. Туштыжо К.Карнавская кокымшо верым налын. Тылеч посна жюри член-влак деч чоныш логалше комплимент-влакым ятыр налмыж нергенат каласыш. Сценыште эн сайын шкем ончыктымылан тудым диплом дене палемденыт.
– Мый Йошкар-Оласе «Зеркало» театральный школышто лу ий шинчымашем нӧлтенам. Очыни, тидыжак кызытсе илышыштем сай полышым ышта. Тушко мый кум ияшак кошташ тӱҥалынам. Тылеч посна музыкальный школышто скрипке, фортепьяано дене шокташ тунемынам. Палантай лӱмеш тӱвыра ден сымыктыш колледжыште музыкальный искусство да эстраде специальность дене дипломым налынам, – умбакыже каласкалыш К.Карнавская.
Карина Карнавскаям палыдыме енже кызыт укеат, очыни. Вет тудо ятыр ий тӱрлӧ еҥын пайремжым сӧрастара: вÿдышӧ семын тырша, программе-влакым ямдыла, мура. Кажне ийын икшыве да кугыеҥ-влак деке Лумӱдыр семын вашка, аниматорланат тырша. Тидлан тудо тӱрлӧ курсышто, форумышто шинчымашыжым, квалификацийжым нӧлта. Тылеч посна кундемыштына Карина пу гыч ыштыме королевский модмаш-влакым курироватла, тимбилдингым эртара.
Карина йомак да юзо шӱлышлан моткоч ӱшана да тидлан илышыштыже чӱчкыдын эҥерта. Лудшына-влакланат тидымак ышташ темла.
К.Карнавская альбомжо гыч налме фото.