Кугу Отечественный сарын шерге ветеранже да тылыште тыршыше-влак!
Марий Элын Кугыжаныш Погынжо лӱм дене элнан эн тӱҥ пайремже – Сеҥымаш кече – дене уло кумылын саламлем!
Жапым чарен шогалташ ок лий: 1945 ий 9 май деч мемнам 77 ий ойыра. Тунамсе шучко событий-влакым шке шинча дене ужшо еҥ шагалрак да шагалрак кодеш. Но совет калыкын Кугу Ачамланде сар годсо подвигше ок мондалт. Марий кундемыште илыше да сеҥымаш шошым лишемдаш полшышо тӱжем дене еҥ курымешлан шарнымашеш кодеш.
Кызыт тӱнямбалне националистический шӱлыш уэш озаланаш тӱҥалын, тӱрлӧ политике вийлан кӧра историйыште лийше факт-влакым вашталтат. Сарын 1418 кече да йӱд шуйнышо неле пагытыште элыштына лийше событий-влакым мондаш ӱжыт. Мыланна, Российыште илыше калыклан, тиде кече – кажне ешыште лийше историйын ужашыже. Тиде мемнан Кугу Сеҥымашна, тудым ме нигӧлан огына пу!
Садланак мыланна, сеҥыше-влакын тукымыштлан, шуко вӱрым йоктарыше сар нерген чыным арален кодымаш, тудын лектышыжым вашталташ тӧчышӧ-влакым чарымаш, фашизмлан вияҥашыже чаракым ыштымаш ик эн тӱҥ задачылан шотлалтеш.
Пагалыме ветеран-влак! Геройло тукымдалан тауштена, тендан илышда волгыдо лийже манын, чыла ышташ тыршена. Ме тендан дене кугешнена да тендам чапландарена. Тыланда кӧра ме илена, пашам ыштена, икшывына-влакым куштена да канде кава йымалне шочмо мландыштына ончыкылыкым чоҥена. Тендан чытышда да патырлыкда, шочмо эл верч шогымыда самырык-влаклан пример лийын кодеш.
Кугу Ачамланде сарыште кредалше, тылыште тыршыше, бомбежкышто колышо да концлагерьыште индыралтше, сеҥымашым лишемдаш полшышо родо-тукымжым шарнен, миллион дене калык 9 майыште Курымашлык полкыш ушна.
Тиде волгыдо пайрем кечын, шерге ветеран-влак, республикыште илыше пагалыме еҥ-влак, пеҥгыде тазалыкым, пиалым, тыныслыкым, порым да чыла сайым тыланем.
Марий Эл Республикын Кугыжаныш Погынжын председательже
А.В.СМИРНОВ.