Электрон промышленностьын кечыже

Марий Эл Правительствын ВК-се лаштыкше гыч налме фото.

Тений гыч октябрьын икымше рушарнянже Российыште электрон промышленностьысо пашаеҥ-влакын кечышт палемдалтеш.

6 октябрьыште Йошкар-Олаште Ленин лӱмеш тӱвыра полатыште печатный платым ыштыше «Технотех» ООО-н пашаеҥже-влаклан пайремле концерт эртаралтын.

Отрасльысе пашаеҥ-шамычым Марий Элым Вуйлатыше да шке лӱмжӧ дене Марий Элысе промышленность, экономике вияҥмаш да торговльо министрын пашажым жаплан шуктышо В.Халюзин саламлен.

Тудын мутшо почеш, электрон промышленность – кызытсе экономикын ик эн кӱлешан отрасльже. Республикыштына ты направлений дене 15 тӱжем утла еҥ тырша – учёный, инженер, химик, технолог, механик, оператор, качестве контролёр-влак – кӧмыт отечественный электроникым вияҥдат да технологий шотышто элнан ончыкылыкшылан негызым пыштат.

«Мый «Технотех» заводышто ик гана веле огыл лийынам да производственный процесс кузе профессионально шукталтым ужынам. Компанийын вуйлатышыже-влак производствым уэмдаш шагал огыл йӧным кучылтыт. Тугеже отрасль вияҥеш, ме ончыко каена», – каласен Владимир Халюзин.

«Технотех» заводым 1971 ийыште чоҥымо. Тудо пел курым наре печатный платым да радиоэлектронный сатум ыштен луктеш.