«Спортсменке, активистке, комсомолко да тыглай мотор ӱдыр!» Тиде мут-влак Кырык сирын тале спортсменкыже Надежда Венцовалан лач келшен толыт. Адакшым «Ӱдырамаш илышым сӧрастараш шочын» маныт. Тиде калыкмутат Надежда нергенак.
Мый тиде спортсменке дене Юл кундем федеральный округын ече дене чемпионатыштыже вашлийым. Моткоч ӧрыктарыш: тыглай марий вате, а чылашт деч писе, чулым, тале лие…
«Ечемжат тошто, но тӱҥжӧ ечыште огыл, а кид-йол вийыште. Сеҥымашке шуаш тренировко да поро йолташ-влак кугу полышым пуэныт», – каласыш чемпионко.
Икымше кечын классике йӧн дене икымше верым налын, кокымшо кечынже – свободный ход дене кумшо верым!
Тиде соревнованийыште Юл кундемын эн виян спортсменже-влак шке вийыштым тергеныт! Кузе от кугешне курыкмарий ӱдыр дене! Тидак мыйым лишкырак палыме лияш тарватыш. Вашлияш йӧн лекте вет!
Кырык сирыште «Волга» бассейнын спортзалыштыже Надеждан спортсмен йолташыже Владимир Солянов дене пырля тренировкым эртарышна. Нуно мыланем кок шагат чоло разминкым ышташ, тренажёр-влакым чын кучылташ, мом йӱаш да мом кочкаш поро каҥаш-влакым пуышт, тидын годымак ме лишкырак палыме лийна.
Надежда Борисовна Венцова Курыкмарий район Пызыкныр сельсовет Томилан селасе шым йочан кугу ешеш шочын. Пызыкныр школышто тунеммыже годымак физкультур урокым туныктышо Вениамин
Филимонович Микряков спорт деке шӱмаҥден.
«Школышто куржталмаште, роллер, ече дене коштмаште поктен шушо иктат уке ыле. Районышто эре икымше лийынам, а республикыште ече дене кугурак ийготан-влак дене пырля куржмем годым икымшыже огыл гынат, призовой вержым эре налам ыле», – шарналта спортсменке.
Материалым мучаш марте 11 мартыште лекше номерыште лудса.
Марина ПОЧТЕНЕВА.