Марий Элыште туризм дене кылдалтше Россий кӱкшытан ятыр мероприятий тений эртаралтын.
5-7 июльышто туристический видеопрезентаций-влакым ямдылыме шотышто «Диво России» фестиваль-конкурсын окружной полуфиналже Йошкар-Олаште лийын. Тушко Российын тӱрлӧ регионжо гыч участник-влак толыныт. Марий Эл гыч 10 участник ушнен, индешынже тӱрлӧ награде дене палемдалтыныт.
6 августышто кундемыштына «Йошка еш» регион-влак кокласе гастрономический фестивальым икымше гана эртарыме. Организаторжо – Марий Элысе Спорт да туризм министерстве. Ты фестиваль кугу гастрономический пайрем шӱлыш дене эртен. Тушко калык кочкышым ямдылыше регионысо чыла гаяк предприятий, изирак да кыдалаш бизнесым вӱдышӧ-влак ушненыт. Фестиваль тӱҥ шотышто Марий кундемыште ямдылыме тӱрлӧ кочкыш дене палдараш келыштаралтын.
20-21 сентябрьыште Йошкар-Олаште Российысе «Туристический сувенир» конкурсын Юл кундем да Урал федеральный округласе окружной этапын финалже эртен. Тушко элнан 18 регионжо гыч участник-влак ушненыт. Марий Эл гыч сувенирым ямдылыше-шамыч коклаште ятыр сеҥыше лийын. Мутлан, «Туристический маршрутын сувенирже» номинацийыште Йошкар-Оласе Т.Евсеев лӱмеш Национальный тоштерын «Марий эпосын геройжо-влак» паша ойыртемалтын. Тудын тӱҥ шонымашыже – марий герой-влакын образыштым тӱрлӧ сувенир продукций гоч ончыкташ да палдараш.
