20 март гыч 19 апрель марте тунемше-влак Марий Элыште единый кугыжаныш экзамен (ЕГЭ) ден кугыжаныш выпускной экзаменым тӱрлӧ амаллан кӧра ончылгоч кучат.
Йошкар-Оласе кум лицейыште, ФСИН-ын кок учрежденийыштыже экзамен-влакым эртарыме пункт-влакым ыштыме. Тушто ЕГЭ-м 56 тунемше да ГВЭ-м 3 тунемше кучаш тӱҥалеш. Пунктлашке 106 специалистым ушымо.
Шуко экзаменым руш йылме (31 еҥ), профильный математике (25 еҥ), биологий (11 еҥ), обществознаний (11 еҥ) дене кучат. Тунемше-влакын тичмаш вашмутыштым тергаш посна комиссийым чумырымо, тушко 43 экспертым ушымо.
20 мартыште географий да литератур дене ЕГЭ ончылгоч эртен. Географий дене ик, литератур дене кум тунемше-влак экзаменым кученыт.