Екатеринбург олаште «ИННОПРОМ-2023» промышленный выставке эртаралтын.
Тушко Российын 25 регионжо гыч 1000 предприятий ушнен, тыгак йотэлла гыч 35 представитель толын. Тушто Марий Эл гыч машиностроений, порошковый металлургий дене кылдалтше, электротехнический оборудованийым, бытовой химийым ыштен лукшо, корным ыштыше 8 предприятий ушнен.
Ончерым почмаште Российысе Правительстве Председатель Михаил Мишустин лийын. Марий Элысе делегацийым Правительстве Председательын алмаштышыже Дмитрий Троицкий вуйлатен.
– Промышленность – республикысе экономикын ик эн тӱҥ отрасльже. Выставкышке регионна гыч у рынокыш лектын кертше предприятий-влакым лукмо. Марий Элым Вуйлатыше Юрий Зайцевын республикысе Правительстве ончылан шындыме задачыже-влак сайын шукталтыт. Тӱҥ шотышто бизнесыште тыршыше-влаклан полыш пуалтеш. Марий Элысе предприятий-шамыч у партнёр-влак дене кылым ыштышт, производствым вияҥдышт манын, выставкышке ушнаш, вес регионлашке миен толаш йӧным ышта, – каласен Д.Троицкий.
Ончерын тӱҥ темыже – «Устойчивое производство: стратегии обновления». Сатум ыштен лукшо-влак икте-весе дене пашам ышташ у формулым, сатум чарныде колтен шогаш, производствым саемдаш йӧным кычалыныт.
Выставкыште икымше гана Марий Элыште ыштен лукмо производственный сату дене палдарыше стендым чумырымо. Марий Эл Республикысе промышленность, экономически вияҥмаш да торговльо министр Станислав Крыловын мутшо почеш, стендым йотэлысе делегаций-влакат ончен лектыныт. Ончыкылан икте-весе дене кылым ыштыме шотыштат мутланеныт.
Марий Эл Республикын представительже-влак тыгак совещанийыш ушненыт. Тудо Российысе субъектлаште промышленный политикым илышыш шыҥдарымын пайдажым иктешлыме рейтинг дене кылдалтын. Совещанийым Российысе Правительстве Председательын алмаштышыже, промышленность да торговльо министр Денис Мантуров эртарен.
Выставке жапыште Марий Элысе делегаций тыгак деловой форумыш да дискуссийыш ушнен.
