17 майыште, Йошкар-Олаште Калыкле тӱвыра пӧртыштӧ Марий тӱвыра рӱдер Йошкар-Оласе Колумб лудмашым эртарен. Тений тушко поэзий кумылан 70 участник ушнен.
Тиде кугу пайремым торжественно почмо, Валентин Колумбын келге да кумда поэзийжым, усталык корныжым шарналтыме. Тений ты конкурсым Ешын идалыкше денат кылдыме. Йоча-влак дене пырля ава, ача-влакат толыныт.
Икшыве-шамыч марла, рушла, финла почеламутым лудыныт. Чылаже вич тӱшка лийын: 7 ияш марте, 8-10, 11-14, 15-18 ияш-влак да 18 ияш деч кугурак-влак. Шукын мотор марий тувырым чиен толыныт, пеш сӧралын койыныт.
Тыште сеҥыше-влак июнь мучаште Моркышто регион-влак кокласе Колумб лудмаште мастарлыкыштым тергаш тӱҥалыт.
– Тений оласе конкурсым Калыкле тӱвыра пӧртыштӧ эртарышна, тиддеч ончыч тудо вес вере лийын. Куандара, тышке кумылын ушнат, еш дене пырля толыт. Ужна: руш йоча-влакат марий тувырым чиен толыныт ыле.
Колумбын поэзийже ила, поснак самырык-влаклан чон куаным, усталык тулым ылыжта манын шонена. Марий тӱвыра рӱдер тидым умбакыжат шуйышаш.
Ты конкурс ойыртемалтше, тыште йоча-влакын мастарлыкыштым, усталыкыштым, литературлан, поэзийлан шӱман улмыштым ужына. Йоча-влак дене кыртмен пашам ыштыман. Тыгодым йылмым шуарымаште конкурс кугу полышым пуа, – мане Марий тӱвыра рӱдерым вуйлатыше В.Г.Петров.
Тений Марий тӱвыра рӱдерлан – 25 ий. В.Петровын палемдымыж почеш, лӱмгече идалыкыште калыкым поснак куандараш тӱҥалыт. Йоча-влаклан шагал огыл мероприятийым ямдылат. Теве 1 июньышто Провой олаште «Йоча тӱня» фестивальым эртарат.
Л.Карпован фотожо.
Колумб лудмашыш Моско ола гыч ончычсо радиовӱдышӧ Людмила Карпова ешыж дене толын ыле. Тудын ныл ияш Алиса ӱдыржӧ В.Колумбын «Машан сӱретше» почеламутым сылнын лудо. Ӱдыр аваж гаяк чолга, бассейныш, кушташ коштеш. Почеламутым сайын тунемеш.
Колумб лудмаш поэзийым йӧратыше-влакым иктеш поген. Кажныже чоным почын, сылнын лудаш тыршен. Ончыкыжымат тыгай лудмаш куатлын да веселан эртаралтеш манын ӱшанена.
Сеҥыше-влак:
7 ияш марте (марий йылме дене): Медведево посёлкысо 6-ш №-ан «Колокольчик» йочасад гыч М.Малинина.
7 ияш марте (руш йылме дене): 30-шо №-ан «Березка» йочасад гыч Т.Шакирова.
«Сылнымут» номинаций 8-10 ияш-влак коклаште (марий йылме дене): И.С.Палантай лӱмеш тӱвыра да сымыктыш колледжын калыкле сымыктыш гимназийже гыч М.Михайлов.
«Сылнымут» номинаций 8-10 ияш-влак коклаште (кусарыме почеламут-влак): И.С.Палантай лӱмеш тӱвыра да сымыктыш колледжын калыкле сымыктыш гимназийже гыч М.Пуртова.
«Сылнымут» номинаций 11-14 ияш-влак коклаште (марий йылме дене): 3-шо №-ан кыдалаш школ гыч Р.Игнатьев.
«Сылнымут» номинаций 11-14 ияш-влак коклаште (кусарыме): 17-ше №-ан кыдалаш школ гыч Э.Петухова.
«Сылнымут» номинаций 15-18 ияш-влак коклаште (марий йылме): Торгово-технологический колледжын гыч В.Иванова.
15-18 ияш-влак (рушла): Торгово-технологический колледж гыч Е.Сафина.
18 ияш деч кугурак (марла): Торгово-технологический колледж гыч Е.Николаева.
Марий тӱвыра рӱдерын, Р.Николаеван, Л.Карпован фотожо-влак.