Эчкевондо (медуница) шӱлымӧ корно, шодо да пагар, верге чер-влакым эмла, туберкулёз, анемий, геморрой годым пайдале, тыгак пуалмым пытара.
Эчкевондым уло кушкылге пеледмыж годым апрель-майыште погат, а пелед пытыме годым (майыште – июнь тӱҥалтыште) – вож воктенысе лышташым.
Шӱлымӧ корно черым эмлаш, вӱр йогымым чараш, вӱрым ыштыме пашам саемдаш манын, кок стакан шокшо вӱдыш ныл изи совла шудым пыштыман, пел шагат шинчыктыман, шӱрыман. Лемым 1/2 – 2/3 стакан дене кечеш кум-ныл гана кочмо деч пел шагат ончыч йӱман, мӱйым але сакырложашым ешараш лиеш.
Але свежа эчкевондо шудо гыч сокшым пунчал лукман. Тудым ик изи совла дене кечеш кум гана мӱй дене пырля йӱман. Свежа сокым холодильникыште аралыман, кок-кум кече деч утла кучыман огыл.
Сусырым, йорам эмлаш манын, ик стакан шокшо вӱдыш кок кугу совла эчкевондым пыштыман, кок шагат шинчыктыман, шӱрыман. Сусырым шӱалташ да компрессым ышташ кучылтман.