Чебоксар олаште шочшо, Курыкмарий район Пӹзыкныр (Церкансола) селаште кушшо Ирина Соловьёва изиж годсек ече дене кошташ йӧрата. Школысо секцийыште мастарлыкшым ий еда нӧлтен толын, вара илыш корныжым спорт дене кылден.
22 ияш Ирина Соловьева МарГУ-што физический культур, спорт да туризм факультетыште кокымшо ий тунемеш, тале ечызе. 2018 ий годсек – спортын ты видше дене Марий Эл Республикысе сборныйышто. Сеҥымашыже шуко. Марий Элысе чемпионатыште ятыр гана ончыл верышке лектын.
Ачаже кумылаҥден
Йоча годсек тудо писе лийын. Школышто баскетбол, волейбол, куштылго атлетике (кросс) дене таҥасымашлашке чолган ушнен. Но ече дене кошташ тудлан эн чот келшен.
– Кандаш ияш улмем годым икымше гана ечышке шогалынам. Тидлан ачам Сергей Гелласьевич Соловьев кумылаҥден. Шкежат самырыкше годым биатлон да ече дене заниматлен. Тудо ончыч Виловат селасе спорт школын ече секцийжын тренерже лийын.
6-9-ше класслаште ече секцийыш коштынам. 10-шо классыште Чебоксарысе олимпийский резерв училищышке тунемаш пурымеке, биатлоныш ушненам. Но варажым ик ий гыч тӱрлӧ амаллан кӧра уэш шочмо школышкем пӧртыльым. 11-ше классыште уэш ече дене кошташ тӱҥалынам, – мане И.Соловьева.
Пожарныйлан тунеммыж годым…
Школ деч вара тыгай профессийым налаш манын, тудо Йошкар-Оласе кугыжаныш да муниципал службо колледжышке каен. Пӧръеҥ-влаклан келшыше, куштылго огыл паша профессий Иринам ӧрыктарен, лӱдыктен огыл, кумылын занятийышке коштын. Кум ийыште пожар лӱдыкшыдымылык, тулым йӧртымӧ технике-влак да МЧС дене кылдалтше паша нерген шуко пален налын. Тыгодым спортым ӧрдыжеш коден огыл.
– 2017 ийыште колледжышке тунемаш пурымеке, ече спорт дене эше талын заниматлаш тӱҥалынам. Йошкар-Оласе «Виктория» олимпийский резерв спорт школышко тренер Евгений Григорьевич Рыбаков деке толынам. Тачат тыштак улам.
2018 ийыште спортын ты видше дене Марий Элын сборныйышкыжо логалынам. Ме Российысе таҥасымашлашке лектын коштына. Тенийысе тургым гыч тыгак олимпийский резерв училищыште спорт подготовкышто улам, – ойла Ирина.
МарГУ-н тале студентше
Спортым йӧратымыжланак ӱдыр МарГУ-шко физический культур, спорт да туризм факультетышке физкультурым туныктышылан тунемаш пурен. МарГУ-што чолгалыкшым ончыктен да сеҥымашке шуын. Ирина тыгак писын куржталыштеш. Сандене вузысо кросслашке ушнаш тырша. Кодшо ийын «Нацийын кроссшо» таҥасымаште икымше верышке лектын. Тыгак ты ийын республикыштына Р.Н.Добрыниным шарныме лӱмеш ече дене таҥасымаште икымше верым налын.