Тыге ойла Курыкмарий район Этьывайныр ял гыч Николаевмыт еш. Олег Викторович ден Ольга Николаевна ныл приёмный йочалан эн лишыл да йӧратыме ача-ава улыт.
Ӱдыржӧ кумылаҥден
Ольга Николаевна – Ӓвӓсир ялыште верланыше Сурский тӱҥ школын директоржо. Пелашыже Олег Викторович – чодыра мастар. Вате-марий кок икшывым ончен-куштеныт. Кугурак Вика ӱдырышт 21 ияш. Тудо маникюрым, шинчавуным ышта. 16 ияш Родион эргышт Чебоксарысе транспорт да строительный технологий техникумышто икымше курсышто тунемеш.
– Йочам йочапӧрт гыч ашнаш налаш ушышкына иканат пурен огыл. Но Вика ӱдырна опеке да попечений деч посна кодшо икшывым ешышкына кондаш кумылаҥден. Ик гана йодеш, вес гана. Тунам «А молан уке?» манын шонаш тӱҥалынам. Пелашем, мый денем таҥастарымаште, шукырак жап шонен, но тудат варажым келшен. Тыге 2015 ий ноябрьыште Йошкар-Оласе «Шокшо пӧрт» приют гыч ӱдырым илаш конденна. Жап эртымеке, аваже правам угыч налмеке, икшыве ешышкыже пӧртылын. Кызыт тудо Ульяновск олаште юристлан тунемеш. Кылна але мартеат уло. Тӱрлӧ амаллан кӧра ача ден ава йочам ончымо шотышто правашт деч посна кодын кертыт. Ме чылаже 9 приёмный йочам онченна. Жап эртымеке, ача ден авашт чын корныш шогалмеке, правашт лиймеке, икшывыштым шкешт деке пӧртылтеныт. Ме нигунам тореш лийын огынал, содыки шке вӱр лишылрак. Адакшым кажне айдемын илышыштыже могай гына азап ок лий. Тидымат умылен моштыман. Кызыт ешыштына ныл приёмный йоча кушкеш. Нунылан чон шокшынам огына чамане, шкенанак улыт, – ойла Ольга Николаевна.
Николаевмыт еш келшен ила. Конешне, коклаштышт умылыдымашат лектеш, тиддеч посна нигузе, но кеч-могай ситуацийыште нуно, вашла колыштын, ик ойыш шуыт.
– Йоча-шамычын кажныжын – шке койыш-шоктышыжо. Южгунам шке йоча дене умылыдымаш лектеш, а ончаш налме икшыве дене кок пачаш нелырак. Вет нуно чыла еҥлан огыт ӱшане, трук коден каят, шонат. Изи улыт гынат, илышыштышт шуко нелылыкым ужыныт. Ик приёмный еш гыч весыш коштшо-влакат шагалын огытыл. Сандене чыла ача-ава тулык але опеке да попечений деч посна кодшо йочам ончен огеш керт. Тиде кугу ответственность. Икшыве дене кылым ышташ иканаште огеш лий гын, чыталтыман, йӧратымашым, порылыкым ончыктыман. Изи икшыве дене ваш умылымаш шукыж годым писынрак лектеш. А подростко йоча дене кылым ышташ шукырак жап кӱлеш. Ме утларакшым кугурак йоча-шамычым ончаш налме. Еҥын йоча уке. Чыла шкенан. Иктыштымат тый сай, а тый уда улат манын ом ойыро. Чыла йоча – ару чонан суксо, – палдарыш О.Николаева.
Еш йӱла уша
Николаевмыт еш кажне рушарнян жапым пырля эртара. Ольга Николаевна каласкала:
– Икшывына-влак кумылнам огыт волто. Мый эре ойлем: паша иктымат ок локтыл. Ешыштына пашалан чылан кожмак улыт. Мый чӱчкыдын школышто кас марте шинчем, пелашемат эре пашаште, толмашешна икшывына-влак мӧҥгысӧ чыла сомылым ыштат, кочкашат шолтен моштат. Вика ӱдырна усталык шӱлышан, Родион техникылан шӱман. Тудо куд ияшак эре ачаж пелен коштын, чыла гаяк техникым виктарен мошта. 16 ияш Ярослав эргына комьютерыште, телефонышто шинчаш йӧрата, IT технологийым шымла. Чебоксарысе экономико-технологический колледжыште икымше курсышто тунемеш. Ачажланат, мыланемат полшаш эре ямде, тидлан жапым кеч-кунам муэш. Кызыт гитар дене шокташ кумылаҥын. 14 ияш Катерина сайын сӱретла, кочкаш ямдылаш полша. Рушарнян ӱдыр-влак кухньышто погынена, коҥгаш олтена да тамле когыльым кӱэштына, а кажне пайремлан кравецым ямдылена.
15 ияш Вика кидпашалан шӱман, 10 ияш Катя 5-ше классыш коштеш. Моткоч ушан. Яра шинчаш ок йӧрате, мом ышташ эре муэш.
Еш йӱланат уло. Кажне кастене физкультминуткым ыштен, ӱстембал модыш дене модына, кечына кузе эртыме нерген каласкалена. Мый пидаш йӧратем, ӱдыр-шамычымат тидлан туныктем. А пелашем эрге-шамычым сурт кокласе пашалан кумылаҥда. Телым чылан снегоход дене кошташ йӧратена. А кеҥежым пӱртӱс лоҥгаш лектына. Сура эҥер воктене канена: колым кучен, шӱрым шолтена. Кажне ийын пырля кундемнан иктаж лукышкыжо миен коштына. Йӱдлан турбазыште кодына, але палаткым шындена. Шкенан кундемнам шымлена. Йоча-влак Марий Элна нерген шукырак палышт, кугешнышт манын шонена.
Чолга еш тылеч посна тӱрлӧ конкурсыш ушна. Шке мастарлыкше, икоян улмыж дене палдара, тӱҥжӧ порылыкым шара.
Еш альбом гыч налме фото.