Эше школышто тунеммыж годымак тудо полицийыште пашам ышташ шонен пыштен да тидлан ямдылалташ тӱҥалын. Шонымашыже шукталтын: таче Станислав Иванов – юстиций капитан, Россий МВД-н Морко районысо пӧлкасе следственный отделын кугурак следовательже.
Школыштак пален
С.Иванов – Морко район Кокласола гыч. Шке ялысе школ (кызыт – лицей) деч вара Россий МВД-н Нижний Новгород оласе академийышкыже тунемаш пурен.
– Школышто физмат классыште тунемынам. Тыгак мыланем историй, обществознаний урок-влак поснак келшеныт. 10-шо классыште улмем годым МВД-н иктаж структурыштыжо служитлаш кумылем лектын. Тылеч вара кӱлеш предмет-влак дене шинчымашем эшеат келгемдаш тӱҥалынам. Физподготовкыланат ятыр жапым ойыренам, – палдара С.Иванов.
Курсант-влак радамыш логалаш куштылго лийын огыл. 300 утла еҥ гыч 75-ым гына налыныт. МВД академийыште тунеммаш рвезылан нелылык деч посна пуалтын. Тунемме деч вара курсант-влаклан ола уремлаш да академий кумдыкышкат патрульыш лекташ кӱлын, наряд-влак лийыныт, КПП-ште шогеныт.
Службыш – шочмо верыш
Вич ий тунеммеке, 2016 ийыште лейтенант Станислав Иванов Морко районысо полиций пӧлкаш следовательлан пашаш толын.
– Эше курсант улмем годымак паленам: Марий Элыште пашам ышташ тӱҥалам, но шке районышкак службыш пӧртылмӧ нерген шонен омыл ыле. Пытартыш курсышто тунеммем годым ты пӧлкаште практикым ныл тылзе наре эртенам. Тунамак вуйлатыше-влак мыланем, тунем пытарымекем, пашаш толаш темленыт. Тыгак лие. Практике деч вара тушто пашам тӱҥалаш куштылгырак ыле, – ойла С.Иванов.
Следовательын ик паша кечыж нерген каласкалаш йодмеке, тудо тыгерак вашештыш:
– Паша кече полиций пӧлкаште тӱшка планёрко гыч тӱҥалеш. Вара шке подразделенийыште вуйлатыше дене планёркым эртарена. Тушто следствий шотышто шындыме задаче-влакым шергалына: уголовный дела шотышто кӧм йодышт шуктымо, кӧ дене эше вашлийын кутырыман да организационный моло момент-влакым рашемдена. Вара пашалан пижына.
Ятыр осал паша онлайн ышталтеш
Технологий ик верыште ок шого. Тиде полиций пашаеҥ-влакын пашаштышт поснак шижалтеш. Службыш толмыж почеш следовательлан иктаж арверым шолыштмо, еҥын тазалыкшылан эҥгекым лӱмын ыштыме дене кылдалтше дела-влакым тарваташ логалын гын, кызыт сӱрет вашталтын. Ятыр преступленийже таче интернетыште онлайн ышталтеш манын палемда С.Иванов.
Следователь лияш куштылго огыл. Тидым самырык еҥ икымше дежурствыж годымак, пашаш толмо почеш кумшо кечын, умылен. Тунам сутка мучко вызовлаш кудалышташ логалын. «Ик вызов гыч толам, чайым темалтем гына, вес вызов пура. Вашке чайым подылам, машинаш шинчам да кудалам. Тыге – дежурство мучко», – шарналта тудо.
Такшым следователь-влак вич кече пашам ыштат да кок кече канат. Дежурствыш кок кечым коден лекман – каныш кечым ончыде.
Ӱмаште кеҥежым Марий Элысе МВД следователь-влак коклаште профессиональный мастарлык конкурсым эртарен. Тушто служебный да физический подготовкым тергеныт, преступлений лийме верыш лектын пашам ыштымым, айдемылан медполышым пуэн моштымым да молымат онченыт. Следователь-влак нормативно-правовой акт-влакымат сайын палышаш улыт. Станислав Ивановат тушко ушнен да икымше верыш лектын.
Опыт жап дене толеш
Кандашымше ий пашам ыштыме жапыште самырык еҥ чыла шотыштат вашталтын. Тидыже койыш-шоктышыштыжат палдырна: стресс годым шкем пеҥгыдын кучаш, нелылык гыч лекташ тунемын. А эше вашке шекланен мошта: ончылнет кутырен шинчыше айдеме чыным ойла але шойыштеш. Следователь тӱрлӧ ситуацийлан акым пуымо годым фактлан эҥертышаш, эмоцийлан эрыкым пуышаш огыл. Тидланат жап туныктен.
– У паша верыш толмеке, чылажым эше от пале. Кеч-могай аланыште тыге. Ончылнет уголовный дела кия, мом да кузе ыштыман – тургыжланет. А жап эрта. Йоҥылыш ыштен колтет – чыла угыч тӱҥалаш логалеш. Опыт жап дене толеш. Кызыт службыштем нелылыкым ом шиж. Пашам утларак веле келша, – манеш С.Иванов.
Яра жапше Станиславын шагал гынат, тудым пайдалын эртараш тырша. Спорт дене кылым куча. Паша деч вара вуйым кандараш ик сай йӧн – книгам лудмаш. Рвезылан утларакшым философий сынан, тыгак историй, экономике, политике нерген лудаш келша, художественный литературымат йӧрата.
С.Ивановын альбомжо гыч налме фото.