Еҥ-влакым у кочкыш дене ӧрыктара

Алексей Эшмеев илышыште могай корным ойыраш манын шуко шонен огыл. Рвезылан изинекак поварын пашаже келшен.

Советский район Ургаш посёлкын эргыже верысе школышто 9 классым тунем пытарымеке, умбакыже Вечын селасе училищыш пекарь-кондитерлан тунемаш пурен. Кум ий гыч дипломым налмеке, Алексей Марий кугыжаныш университетыш тунемаш пурен.

Алексей, молан лач повар профессийым ойырен налынат?

Изиракем годым мый авамын да ковамын кочкышым ямдылымыштым, когыльым кӱэштмыштым эскераш йӧратенам. А вара шкежат эркын-эркын тунем шуынам. Санденак, очыни, тудо жапыштак повар лиям манын паленам.

Повар специальностьым налмеке, вес пашаш каяш шонымаш лийын огыл?

Университетыш пурымеке, ача-ава деч оксам йодаш огыл манын, пашам кычалаш тӱҥальым. Адакшым тунемме жапыште паша опытым погаш шонымаш лийын. Ик тылзе гыч Йошкар-Оласе ик кафеш пашаш пуренам. Тушто вич ий тыршенам. Пытартыш курсышто тунеммем годым мыйым рестораныш ӱжыныт. Эн ондак поварын полышкалышыже гына лийынам. Иктаж пел ий гыч кухньо сменын кугуракшылан шогалтеныт. Эше ик ият пеле гыч шеф-повар лийынам. Кызыт мартеат туштак пашам ыштем. Вес вере каяш шонымаш лийын огыл.

Пашат мо дене келша?

Ресторанышкына толшо еҥ-влакым уэш да уэш ӧрыктараш йӧратем. Шеф-повар лияш куштылгыжак огыл. Эре у кочкышым шоныман. Сатум Йошкар-Ола деч тораште огыл улшо экофермыште налаш тыршем. Вет кочкышын тамже, качествыже, сатун свежалыкше деч шога.

Повар огыл гын, кӧ лият ыле?

Жапым мӧҥгеш савыралаш гын, мый илышыштем нимом ом вашталте ыле. Кызытсе сомылем мыланем моткоч келша. Тиде оҥай паша.

Могай кочкышым ямдылаш йӧратет?

Йӧратем чыла. Еҥ-влаклан куаным, у шӱлышым кондыжо гына. Кеч-могай кочкышымат ямдылен кертам.

Ала иктаж-гана тыглай огыл кочкышым ямдыленат?

Да, ямдыленам – осьминогым да Камчаткысе крабым. Мыланем тиде тыглай огыл кочкышым ыштымаште икымше опыт лийын, сандене шарнымашеш кодын.

Лишыл еҥет-влаклан кочкаш шолтет?

Шолтем. Мӧҥгыштӧ чӱчкыдын болоньезе соусан лазаньям ышташ йодыт.

Школышто тунеммет годым кочкаш шолтымо деч посна мом ышташ йӧратенат?

Мый изинек спорт дене заниматленам. Волейбол дене модынам, ече дене коштынам.

Ончыкыжым тиде пашаштак кодат?

Мыйын ик шонымаш уло – вашкен ямдылыме кочкыш кафем почаш. Но тидлан йӧн кӱлеш.

Тау, Алексей. Шонымашет-влак шукталтышт.