Ятыр ава йоча дене шинчыме годым кидпашалан утларак шӱмаҥеш. Икшывыжым малаш пыштен, кӱлеш сомылым ыштен, чонлан келшыше пашам кучен шинчеш. Икте сӱретла, весе пидеш, кумшо урга… Кидпашам ыштыме годым вуйушым кандарет, чон ласкалыкым налат.
Параньга район Олор ялын шочшыжо Татьяна Войкова школышто тунеммыж годымак крючок дене пидаш тунемын. Жап эртыме дене тиде сомыл ӧрдыжыш шӱкалалтын. А кызыт Татьяна, кок шочшан ава, кидпашалан уэш пижын.
– Школышто тунеммем годым салфетке ден мочыла-влакым пидынам. Вара МарГУ-ш тунемаш пуренам, физмат факультетыште шинчымашым погенам. Тунам пидаш жап лийын огыл. Дипломым налмеке, Йошкар-Оласе ик банкыш пашаш пуренам. Тунамат – эр гыч кас марте пашаште, кидпашалан ярсен омыл. Кызыт йоча дене шинчем, – манеш Татьяна. – Икшывем-влаклан яра жапыште пинеткым, погремушкым, пушкыдо модыш-влакым пидынам.
Эше Татьяналан вургемым ургымо паша келша. Интернетыште ургаш туныктымо видео-влакым ончен, шкенжынат тыгайымак ышташ кумылжо лектын. Тылеч ончыч школышто труд урокышто ончылсакышым гына урген ончен ыле. Туге гынат у вургемым «шочыктымо» сомыл самырык аван чонжым савырен. Тыге тений Татьяна шкаланже «полышкалышым», ургымо машинам, налын.
– Икымше пашам – ямде выкройко дене ургымо кардиган, тудым акамлан пӧлек шотеш ямдыленам, – палдара Татьяна. – Тӱжвач ончымаште кардиган пеш мотор, но кӧргӧ могыржо сайынжак лектын огыл.
Ончыч Т.Войкова интернетысе ямде выкройко дене гына урген, тушто мом ыштышашым сайын умылтарыме лийын. Шукерте огыл тудо моделирований курсым эртен. Ынде шонымо вургемлан кӱлеш выкройкым шке ямдылен, мом шона, тудым урген кертеш. Шкаланже кӱчык жакетым, юбко-влакым, брюкым урген чиен. Пелашыжлан йолашым, толстовкым, эргыжлан шӱштӧ курткымат урген чиктен, пеш мотор лектын.
Мо кӱлешым кидмастар Йошкар-Оласе кевытлаште наледа. Ик вургемым вашке ургаш ок лий, 4-5 кечым ойырыман. Икшыве-влакланат, сурт сомылланат жапым ситарыман.
– Чыла пашаштат чытыш кӱлеш. Ургымо годымат тыгак. Ямдылыме годым вургем шонымем семын ок лек гын, рончем да уэш ыштем. Шыде лектешат, кидпашам ӧрдыжкӧ кораҥдем да вес сомылыш куснем. Икмыняр жап гыч адак кучен шинчам, да вара чылажат сайын лектеш, – манеш кидмастар.
Шке пашажын фотожым Т.Войкова соцсетьласе лаштыклашкыже вераҥда. Нуным ончен, палымыже-влак тыгайымак але шке шонымышт гайым урген пуаш йодыт. Кумылан-влак шукемыт гына. А Татьянам ургымо паша утларак да утларак «авалта», у шонымаш, идей-шамыч шочыт. Тек нуно илышыш шыҥдаралтыт, вет шке кидпашаж дене тудо еҥ-влакым пиаланым ышта.
Т.Войкован альбомжо гыч налме фото-влак.