Оршанке районышко кудалмына годым корнышто ик пӧръеҥым машинашкына шындышна. Тудо «Мне в деревню Дровишкино надо», – мане. Ме мыскаражым умылышна, Пуялышке суртшо воктекак волтен кодышна.
Ял мылам вигак келшыш. Пӧрт-влак тоштын огыт кой, «вуйышт» ужар,чевер, канде тӱсан гына улыт. Кевыт турашке лишеммына годым ик кокай, «Кугарня» газет редакций гыч улыдас мане. Мыланна редакцийыш серышым возен пыштымыж нерген ойлыш. Почтын миен, колтен веле шуктен огыл.
Лидия Михайловна Стрелкова Пуялыштак шочын, тышкак марлан лектын. Кум шочшан, ныл уныкан ава-кова. Пеленже эрге-шешкыже, уныкаже илат. Чон вургыжмыжым каласкалыш: «Ялна моткоч мотор, куд уреман, паша вер укелан кора самырык-влак умбаке каят, тидлан кӧра илалше-влак гына кодына ала-мо ынде. Уныкана-влакым вӱдалтен, модмыштым шекланен кечым эртарена. Йӧра ялыштына клуб, библиотеке, кок кевыт улыт. Концертым ончаш пеш йӧратена. Библиотекыш книгам лудаш коштына. Ме, шоҥго-влак толына да марий книгам, газет-влакым лудына. Погынена да иктым-весе нерген мутланена, мом лудмына нерген каласкалена. Тидыже мемнам кеч изиш куандара».
Ялын пӱрымашыже Кугунур села дене кылдалтын, тудо рӱдӧ илемлан шотлалтеш. Йоча-влакым автобус ондак йочасадыш намиен кода, вара уэш тунемше-шамычым налаш толеш. Пуялыште газпучым шупшмо, вӱд башне, таве улыт. Но кызыт ынде шукын пӧртышкат вӱдым пурташ тӱҥалыныт. Вольыкымат ашнат. Ушкалым черет дене кӱтат. Ик ушкаллан — ик кече коштман. «Ушкалым оксалан лийынак ашнена», — мане Лидия Михайловна. Шӧр-торыкым Йошкар-Олашке ужалаш кудалыштыт. Пенсийыш лекмешкыже, фермыште презым ончышылан пашам ыштымыжым шарналтыш. Колхоз лийме годым паша ыле. Пуламыр годсо пагыт кажне еҥын шӱмжым коштара. Вет шинча ончылнак «Нива» колхозна пытыш, кугу ферме «тулыкеш» кодо.
Пуялыште урем-влак ару улыт. Клуб воктене Кугу Отечественный сарыште вуйыштым пыштыше-влаклан памятникым шогалтыме. Йырже эреак эрыктен шогат. Староста Михаил Мочалов чыла гаяк мероприятийым эртарымаште вуйын шога, тудо еҥ-влакым чумырен, могай пашам ышташ кӱлмӧ нерген ойла.
Машинан еҥ-влак Йошкар-Олашке пашам ышташ кудалыштыт. Пытартыш жапыште ипотеке дене пачерым налаш тӱҥалыныт, садлан ынде ӧрдыжтӧ илат. «Лийже ыле паша вер, ялыштыже илаш могай сай», — манын, Лидия Стрелкова мемнан дене чеверласыш. Иктым раш шижым: ава шӱм йоча-влак верч кузе ойгыра, лач тугак тудын чонжо ялын ончыкылыкшо верч азаплана.
Пуял Йошкар-Ола деч 35 меҥге тораште верланен. 200 наре сурт уло. Ялыште РСФСР-ын да МАССР-ын калык артистше Степан Иванович Кузьминых шочын