Лӱддымӧ, чолга, тале, кеч-кӧлан да кеч-кунамат полыш кидым шуяш ямде. Кожлаште йомшо еҥым кычалаш, вӱдыш пуреҥгайышым утараш але тулым йӧрташ тудо огеш лӱд, неле-йӧсӧ деч огеш чакне. Тиде – Шернур район Эҥермучаш ялеш шочын-кушшо, ПГТУ-што чоҥымо паша да архитектур институтышто нылымше курсышто тунемше, «Волгатех» пожарыште утарыше отрядын еҥже Виктория Пантелеева. Чолган пашам ыштымыжлан кодшо ийыште тудлан Йошкар-Ола мэрын стипендийжым ойырымо.
Икымше полышым пуэн кертеш
Виктория еҥлан поро пашам ышташ, полышым пуаш йоча годсек шонен. Тидлан тудо Совет Ушем Герой А.М.Яналов лӱмеш Шернур посёлкысо 1-ше №-ан школышто кадет корпусышто тунеммыж годым утыр кумылаҥын. Военный подготовкым эртен, спорт дене таҥлалтын. Эн чот тудлан туризм секцийышке кошташ, лӱдыкшыдымылык школ толкынышко ушнаш келшен. Кок вережат тунемше-влаклан икымше полышым пуаш сайын туныктеныт. Сандене Виктория школ годсек вӱр йогымым чарен, вуйушым йомдарышым кынелтен, шӱм шогалме, шӱлыш петырныме годым еҥым тырлыктарен да моло азап годым полышым пуэн кертеш.
– А туризмлан ОБЖ-ым туныктышо да кадет корпусын военный вуйлатышыже Руслан Васильевич Паймаков кумылаҥден. Кажне сеҥымашем ончыко каяш шӱкалтышым пуэн. Турслётыш коштынам, кӱкшӧ результатым ончыктымем дене варажым Марий Элын сборныйышкыжо логалынам.
Лӱдыкшыдымылык школ толкынышто пожар деч аралалтме пашалан утларак тунемынна. 8-ше классыште лӱдыкшыдымылык школ денат кылдалтше Марий Элын сборныйышко пуренам, – мане В.Пантелеева.
Отрядын чолга еҥже
Школ деч вара Виктория Йошкар-Олашке ПГТУ-шко чоҥымо паша да архитектур институтышко техносферный безопасность специальность дене тунемаш пурен. Кызыт эше Йошкар-Оласе пожар лӱдыкшыдымылык управлений службышто специалистлан тырша.
Еҥлан полшаш вашкыже улмыжлан кӧра ӱдыр 1-ше курс гычак «Волгатех» пожарыште утарыше отрядышке ушнен.
Умбакыже 1 апрельыште лекше номерыште лудса.
