Ялысе пӧртна эҥер воктене шинча. Пакча гоч эҥер корем шуйна. Кажне шошым вӱд сер гыч лектеш да кудывечыш пура, пакчам мушкеш. А кеҥежым кошка, вӱд йӧршеш уке гаяк, куакшеммыжлан кӧра шошым вӱд сер гыч лектеш манын шонена. Шке гыч эҥер коремым келгемдаш лиеш мо? Кызыт келгытше метр веле.
Т.Семёнова.
Морко район.
Марий Эл Республикын Пӱртӱс поянлык, экологий да йырым-йырысе средам аралыме министерствыже вашешта:
– Российысе Вӱд кодексын 8-ше статьяж дене келшышын, вӱд объект-влак федеральный собственностьлан шотлалтыт, тышке пӱя да вӱд дене темше карьер гына огеш пуро.
Вӱд объектын пундашыжым але сержым вашталтыме дене кылдалтше пашам ышташ шонеда гын, вӱд объектым пайдаланымашке налме шотышто решенийым оформитлыман.
Федеральный собственностьышто улшо вӱд объект-влакым министерстве пайдаланаш пуа. Решенийым оформитлаш манын, министерствыш (Йошкар-Ола, Ленин проспект, 24б пӧрт) вӱд объектым пуымо шотышто йодмашым возыман да кӱлеш документ-влакым пуыман. Решенийым налаш кӱлеш документ-влакым да нуным кузе оформитлаш йодмашым РФ Правительствын 18-ше номеран пунчалже (2022 ий 19 январь) дене пеҥгыдемдыме Вӱд объектым пуымо шотышто решенийым ямдылыме да приниматлыме правилын 9-ше ден 10-шо пунктлаштыже ончыктымо.
Тыгак ешарена: пундашым келгемдаш да моло пашам шукташ манын, вӱд йымач лукмо мландым кучылтмо радамым Российысе Пӱртӱс министерствын 2020 ий 15 апрельыште лукмо 220-шо номеран приказыштыже ончыктымо.