Эҥер, ер воктене шекланыза!

Кеҥежым шокшо игече шогымылан кöра шукын йӱштылаш каяш йöратат.  Но южышт вÿдыштö шкем кузе кучаш кӱлмö шотышто правилым йöршеш шотыш огыт нал да тидлан кöра туткарыш логалыт – вÿд йымаке каят. Вӱд нерген ойлымо годым кугу тӱткышым йоча-влаклан поснак ойырыман, нуным эре эскерыман.  Тидын нерген МЧС-ын Марий Эл Республикысе тӱҥ управленийыштыже вӱд объектлаште еҥ-влакым аралыме пöлка вуйлатыше, маломерный судно-влак шотышто тӱҥ инспектор Александр Крикунов каласкала.

Тений Марий Элыште кеҥеж жапыште чылаже вӱдыш пуреҥгайыме дене 11 еҥын ӱмыржö кӱрылтын. Тышеч коктынжо пошкудо Татарстан ден Чуваший Республик-влакын шочшышт лийыныт. Чумыр ончалаш гын, 10 еҥже (91%) пöръеҥ гын, иктыже – ӱдырамаш. Тышеч 8 еҥже йӱштылмö тургым почылтмеке туткарыш логалын. Кодшо ийын кеҥеж жапыште 15 еҥ вӱдыштö илыш дене чеверласен.

«Вӱд объектлаште еҥ-влакын ӱмырышт тӱрлö амаллан кöра кӱрылтеш. Южыштын вӱдыштö шӱмышт шогалеш, вÿргонышто спазм лиеш але еҥ сусырга. Вӱдышкö утларакшым аракам йӱшö 35 гыч 55 ияш пöръеҥ-влак пуреҥгаят. Шарныман: кочывӱдым подылынат гын, йӱштылаш пурыман огыл. Чаманаш логалеш, чылаж годым тидым огыт умыло. Вӱдышкö кугыеҥ-влак веле огыл, йоча-влакат пуреҥгаят. Тений республикыште тыгай туткар лийын огыл гынат, кодшо ийын шошо-кеҥеж жапыште 3 йоча тыгай азапыш логалын. Кумытынат подросток лийыныт.

Тений Марий Элысе образований министерстве дене пырля йоча-влакын ийын моштымышт шотышто анализым эртаренна. Республикыштына школышко коштшо 45% йоча йöршеш ийын огеш мошто улмаш. Республикыште ер, эҥер шуко улыт, бассейнат ятыр. Бассейнлаште йӱштылаш специалист, тренер-влак икшыве-влакым вашке туныктен шуктат», — ойла А.Крикунов.

Туткарыш йӱшöвуя улмылан веле огыл, тыгак йӱштылаш келыштарыдыме верышке пурымылан, ерыште, эҥерыште шкем кучымо правилым шотыш налдымылан кöра логалыт. Пытартыш кум ийыште тыгай случай-влакым утларакшым Медведево, Звенигово, Курыкмарий районлаште лийыныт. Палыдыме верлаште йӱштылаш огеш кӱл!

Пляжлаште йӱштылаш пешыже лӱдыкшö огыл, вет тушто чылажымат келыштарыме, утарыше постат уло, тӱрлö травме ынже лий манын, вӱд пундашым тергат.

«Муниципальный пляж-влак шукемыт. Тений 16 тыгай пляж уло. Икымше муниципальный пляжым 2005 ийыште Параньга посёлкышто почмо.  Тудо пагытым тачат шарнем, тунам район администрацийым вуйлатыше Альфит Ибраев деке ӱдырамаш-влак толын тауштеныт. Кеҥеж пагыт годым эрдене пашашке лектын каена гынат,  йоча-влак шотышто чот тургыжланаш огына тӱҥал маныныт.

Тораште огыл вӱд объект уло гын, йоча-влак кеч-кунамат тушко куржыт. Но кунам вӱд воктене верым йӱштылаш келыштарыме, эше кугыеҥ, утарыше-влак улыт гын, тунар лӱдыкшö огеш лий», – ойла А.Крикунов.

Пляж-влак Советский, Юрино, Марий Турек районлаште ешаралтыныт. Тыгак республикысе каныме базылаште, санаторийлаште, тазалыкым пеҥгыдемдыме йоча лагерьлаште 25 пляж уло.

Кажне ийын республикышке вес регионла гыч эҥерла дене туристический группо-влак байдарке ден ийын толыт. Нунын коклашке поснак йоча группымат пуртыман. Тений идалык тӱҥалтыште 200  наре йочан 12 йоча тур группышто  лӱдыкшым кораҥдыме. Тушеч 9 группыжо Российын вес субъектлаж гыч лийын.

Икманаш, кеч-кушко каяш тарванеда гынат, эре тӱткö лийман, чыла палыман. Поснак вӱд воктене каныме годым шкем шот дене кучыман, чылажымат шонен ыштыман.