Сӱан толеш! Сӱан толеш!
25 апрельыште Марий тӱвыра рӱдер Марий самырык театрын сценыштыже «Сӱан толеш! Сӱан толеш!» усталык апшаткудым эртарен. Тудым Марий талешке кечылан да тений Российыште калык-влакын тӱвыра поянлыкыштлан пӧлеклыме.
Курыкмарий район Эмӓн тӱвыра пӧртын «Шанавӹл» ансамбльже чаплын ончыктыш.
«Тиде фольклор сӱрет репертуарыштына шукертсекак уло. Ты выступленийна дене эше 2006 ийыште Морко районышто «Сӱан» фестивальыште Гран-прим налынна. Кызыт тудым кӱчыкемден уэмденна. Кодшо ийын Крымысе Судак оласе фестивальыште тидымак ончыктенна. Мыйын шонымаште, шуко вере ӱдырым сурт гыч лупш дене лупшен луктын наҥгаят, а ме ты номерыш утларак куштымаш ден мурымашым пуртенна. Кундемыштына марий сӱан ок шокто гынат, сортам чӱктен, аважын киндым кучыктымыжо, ӱдыр йӱмашат йомын огытыл», – каласкалыш «Шанавӹл» ансамбльым вуйлатыше Галина Суворова.