М.Шкетан лӱмеш Марий драмтеатрыште чолга, талантан самырык артист пашам ышта. Таче ме Морко район Шӱргӧ ялеш шочын-кушшо Наталия Алексееван ешыж дене палымым ыштена. Наталия ден Александр Йошкар-Олаште илат, кок эргым ончен куштат.
Икте-весым пагалыман…
Наталия – йӧратыме пелаш, кок шочшан ава, сай озавате. Александр ден Наталиян мужыраҥмыштлан тений 5 ий темеш. Александр – Медведево кундем гыч, тудо военный.
Кызыт еш театрын ойырымо служебный пачерыште ила. Ача-авам ныл ияш Матвей да ик ияш Тимофей куандарат, ончыко каяш кугу ӱшаным пуат. Эрге-влак моткоч чулым кушкыт. Коктынат мечым чумаш, кушташ йӧратат. А изи Матвей эше футболла модын мошта.
Яра жап годым ты еш вӱд воктеке але модмо верышке каналташ лектеш. Стадионышто южгунам куржталыштыт, родо-тукым деке миен толыт.
– Мыйын пелашем – эн тӱҥ эҥертышем, а шочшына-шамыч ешнан саскаже улыт. Саша пелашем тыматле, умылышо. Шкемым пиаланлан шотлем. Ава лияш – ответственный паша да тыгодымак моткоч оҥай. Йоча-влак мылам «кушкаш» полшат, ончыкылык илышын кугу стимуляторжо улыт, шукылан туныктат. Ава лият гын, шкем огыл, а эн ондак йоча-влакым шонет. Вет когыньыштым эре эскерен шуктыман. Тидын шотышто Александр пелашем полышкала. Кугуракше йочасадыш коштеш гын, изиракшым ме черет дене ончена. Коктынат огына ярсе гын, акамым полшаш йодам але Тимофейым театрыш намием. Койыш-шоктышышт дене эргым-влак ачашт гае ласка улыт. Икшывем-влак чын корно дене кайышт манын воспитатлена.
Мый тӱрлӧ кочкышым ямдылем, чӱчкыдын мелнам кӱэштам, шарлоткым ыштем, –ойла Наталия.
«Вате-марий – мужыр оҥгыр», – маныт калыкыште. Вет нуно кеч-момат ик семын келшен ыштат. Мужыр икоян, умылен моштышо гын, еш пеҥгыде лиеш. Наталия Алексееван мутшо почеш, ешыште вате-марий ваш пагален, умылен, ваш кутырен, келшен илен моштышаш улыт.
– Мо огеш келше гын, вигак ойлыман да иканаште тӧрлаш тыршыман. Ӱдыр-каче годсо йӧратымашым арален кодаш кӱлеш. Эн тӱҥжӧ – ӱдырамашым мут дене веле огыл, а чон дене йӧратыман. Поддержка манмет ситыше гын, тунам чылажат сай лиеш. Ешыште шукыжо ӱдырамаш кумыл деч шога. Тудын кумылжо сай гын, еш шулдыраҥеш. Ӱдырамаш пеледыш гай. Сад-пакчазе кузе тудым онча, туге тудо пеледеш, – иктешлыш Н.Алексеева.
Кажне образ шерге
Наталиям тӱрлӧ спектакльыште ужаш лиеш. «Кресӱдыр» спектакльыште кресӱдырым, «Эргымлан кузыкышто» Фифам, «Тулар ден тулачыште» Светам, «Эреҥерыште» Оринам, «Йӧратымаш, йӧратымаш…» постановкышто Светланам, «Ава капиталыште» Верам да моло спектакльыште тӱҥ рольым модеш.
– Тӱҥ рольым гына модын, артист шкенжым артистлан шотлен огеш керт. Тӱрлӧ кӱкшытан роль сценыште сайын почылташ полша. Мыланем чыла пашам келша, кеч тӱҥ але тӱҥ огыл лийже. Артист кажне спектакльыште рольыштыжо вашталтшаш. Чыла вере икгай коят гын, ончышо-влаклан оҥай огеш лий, артист профессионально кушмым чарна, – мане Н.Алексеева.
Умбакыже 8 июльышто лекше у номерыште лудса.