Тыге маналтеш Йошкар-Оласе историй тоштерыште эртарыме ончер.
Тушто оласе кидпаша конкурсыш пуымо паша-влак ончыкталтыныт. Тиде шкешотан фестивальыш тӱрлӧ студий ден кружок вуйлатыше да посна кидмастар-шамыч (чылаже 37 еҥ) 200 утла пашам колтеныт. Тыште картине, пӱчкеден ыштыме одеял, курчак, бисер да сутаж дене сӧрастарымаш, модыш да молат улыт.
Нунын коклаш 7-ше номеран колонийыште улшо Наталья Баранованат пашаже логалын. Судитлыме ӱдырамаш администрацийын разрешенийже дене ончерым почмашке миен. Кидпашам лачак режиман тӧнежыште шукташ тӱҥалын.
– Икымше пашам пӱчӧ презе лийын. Тудым ландшафтан дизайн конкурсышко клумбым сӧрастараш ыштенам. Тылеч вара шагал огыл экспонат шочын, южышт тӧнеж да республик деч ӧрдыжтӧ улыт, – ойла Наталья.
Кок ий ончыч Н.Баранован «Сафари» экспозицийже Москошто Калык художественный кидпаша тӱнямбал фестивальыште ончыкталтын. А кодшо ийын кок декупажный презыжым Воронеж областьысе Россошь олаште пашам ыштыше Ушкал тоштерлан пӧлеклыме.
«Руками женщин» ончерлан Н.Баранова декопатч ден декупаж стильла дене «Ял кудывече» коллекцийым ямдылен. Тудым ышташ йоча годсо пагытыште кеҥежым ялыште коваж дене лийме шарнымашыже полшен. Коллекций «Интерьерная игрушка. Декор» номинацийыш пуалтын. Ты да моло пашам 29 март марте ончалаш йӧн уло.
Россий ФСИН-ын Марий Элысе управленийжын пресс-службыжын уверже почеш ямдылыме.
Эльвира Терентьева.