Ӱдырамашым армийыште чаманат?

 

Советский район Роҥго селаште шочын-кушшо Анастасия Малинина – моткоч тыматле, тунамак пеҥгыдын йодын моштышо ӱдыр. Школышто тудо сайын тунемын, кажне гаяк конкурсышто, олимпиадыште ончыл верыште лийын. Ик гана веле огыл тудым тӱрлӧ кундемыш школын чапшым аралаш колтеныт. Тылеч посна Настя ныжыл йӱкшӧ дене ойыртемалтын. Сценыште марла муралтен колтымыжо шуко еҥын кумылжым савырен.

Настя илышыжым ны тӱвыра, ны шинчымаш алан дене кылден огыл, тудо школышто тунеммыж годсек военный лияш шонен, эсогыл Пермь оласе военный училищыш кинологлан пураш ямдылалтын.

«Авам туныктышылан пашам ышта, сандене тиде профессийым изинек пален кушкынам. Школышто тунеммем годым военный училищыш тунемаш пурен ом керт гын, туныктышо лиям манын шоненам. Кинологлан тунемаш пураш медосмотрым эртен кертын омыл, сандене Марий кугыжаныш университетыш тӱҥалтыш класслам туныктышыо лияш экзаменым кученам», мане А.Малинина.

Анастасия 2016 ийыште бакалавриатым йошкар диплом дене тунем пытарен да, изи годсо шонымашыжым шукташ манын, Йошкар-Ола воктенысе ик военный частьыш пашаш пураш йодын миен. Но тушто ӱдырамаш-влакым огына нал маныныт. Тыге ӱдыр, шуко шоныде, Советский посёлкысо 2-шо №-ан школыш тӱҥалтыш класслам туныкташ каен.

 – Туныктышо лияш мыланем моткоч келшен, но изи пашадарлан кӧра тиде паша гыч каяш логале. Адакшым чонем садак вес вере шупшын. 2019 ийыште военный лияш уэш тӧчен ончышым да мыйым служитлаш нальыч, –  умбакыже ойла Анастасия.

Служитлаш пурымет годым физподготовкымат сдатлаш логалын?

– Да, ик километрым куржынам, отжиманийым ыштенам, тыгак челночный куржталмашымат тергеныт. Чыла нормативым эн кӱкшӧ уровень дене сдатленам. Вара мемнам, служитлаш шонышо-влакым, Саратов областьысе Вольск олаш колтышт. Тушто ик тылзе ямдылалтынна.

Кызыт Настя Йошкар-Ола ден Солнечный посёлко коклаште верланыше Киево-Житомирский ракетный дивизийын 16-шо площадкыштыже служитла. Тудо частьысе телефон йыҥгыр-влакым уша. Тыгак жаплан психолог сомылым шукта. Срочный службым эртыше салтак-влак, тыгак контракт почеш служитлаш толшо-влак дене пашам ышта. Боевой дежурство деч ончыч салтак-влаклан тестированийым эртара. Караулыш кайыше-влакым поснак тӱткын эскера.

Частьыштыда ӱдырамаш-влак могайрак ийготан улыт?

– Утларакше самырык-влак служитлат. 18 ияш-влакат толыт. Но кугурак ийготан-влакат улыт.

Ӱдырамаш-влакым армийыште чаманат манме ойым колынам. Тиде чын?

– Мемнан дене тыге ойлат: «Тыште ӱдырамаш уке, тыште чыланат –  военнослужащий». Ме пӧръеҥ семынак неле автоматым нумалына, лӱйкалена, маршироватлена, а кунамже лумымат кышкена. Чыла тӱрлӧ сомылым ышташ логалеш.

Настя, тыйын ешет, изи икшывет улыт. Армийым да еш илышым кылдаш неле?

– Тидын шотышто ӱдырамаш-влаклан нелырак. Поснак шкет ава-влаклан йӧсӧ.  Но воктене умылышо, полшаш ямде еҥ уло гын, нимогай нелылыкым от шиж.

Пелашем ӱдырнам йочасадыш наҥгая, шкеак налаш кая. Толмемлан кочкашат шолтен ямдыла. Дежурство годым икмыняр кече дене часть гыч огына лек. Але теве ик ийлан кок гана уло полк тылзылан чодырашке ученийыш кая. Тунам мыланна ик тылзе полкышто лияш логалеш. Южгунам гына мӧҥгӧ колтат. Тунамат пелашем мыйым умыла, кертмыж семын полша.

Настя, служитлаш кайыметлан от ӧкынӧ?

– Илышыште чылажат лиеш. Южгунам молан тышке толынам шонымашат вуйыш пура. Туге гынат служитлаш мыланем моткоч келша, шке верыштем улам манын шонем.  Тидым мый туныктышылан пашам ыштен ончымеке, поснак чот шижынам.