Ӱдырамаш ялыште пашам ышта гын…

Ялыште пашам ыштыше ӱдырамашын закон почеш ешартыш гарантийже уло. Тидын нерген Марий Эл Республикысе прокурорын полышкалышыже Ольга Лаптева умылтара.

2019 ий ноябрьыште Паша кодексыш 263.1 статьям ешарыме. Тудын дене келшышын, ялыште пашам ыштыше ӱдырамаш-влакын тыгай правашт уло:

кажне тылзын ик гана ешартыш каныш кечым налаш йодмашым возен кертыт, но ты кечылан пашадар огеш тӱлалт;

арняште 36 шагат деч утла пашам ыштышаш огытыл, но кӱчыкрак паша арня федеральный закон, РФ-ын моло нормативный правовой актше дене палемдыме огыл гын. Тыгодым пашадар тичмаш паша арнясе семынак тӱлалтшаш;

паша условий почеш паша кече икмыняр ужашлан пайлалтын гын, пашадар ешарен тӱлалтшаш.

Тыге организаций-влак яллаште верланеныт гын, пашам темлыше-влак кеч-могай должностян пашаеҥыштлан тыгай льгото-влакым пуышаш улыт.

Ты йодмашым шуктыдымылан КоАП-ын 5.27 статьяж почеш административно мут кучаш перна.