11 августышто «Марий Эл» ареныште икымше полышым пуымо шотышто мастер-класс лийын. Тудым самырык ӱдыр, чолга студентке да тале спортсменке Мария Харитонова эртарен.
Мария Параньга район Усола ялыште шочын-кушкын. Изинек пакчаште шогылташ, клумбым ышташ йӧратен, сандене ландшафтный дизайнер лияш кумылаҥын. Кодшо ийын ПГТУ-ш «Ландшафтный архитектур» направлений дене тунемаш пурен.
Полышым пуаш туныктат
Университетыште шинчымашым погаш тӱҥалмеке, Мария Андрей Сорокин лӱмеш пожарно-спасательный отрядыш ушнен. Самырык утарышылан тунем лектын. Кызыт – «Российысе Йошкар Ырес» мер организацийын республикысе пӧлкаштыже изирак инструктор.
– Отрядыште 20 еҥ уло. Ме учебно-тренировочный сборыш коштына, альпинизм дене заниматлена. Кажне ийын сплавыш каяш чумыргена. Киров кундемысе Пушья села гыч тӱҥалына да Чумбылат курык марте катамаран дене ийын каена. «Айдеме фактор», «Лӱдыкшыдымылык школ» таҥасымашлаш ушнена, чӱчкыдын ончыл верышке лектына. Тыгак Волгатехыште тунемше-влаклан эҥгекыш логалше еҥым терген лекме, жгут ден шиным пыштыме, сердечно-легочной реанимацийым ыштыме шотышто мастер-класслам эртарена, – палдара Мария.
«Российысе Йошкар Ырес» мер организацийын ӱдыр-рвезыже-шамыч школлаш, йочасадыш лектын коштыт да ик шагат жапыште икымше полышым пуаш туныктат.
Чемпионко
2 августышто Параньга районысо Элпанур ялыште спорт ориентирований дене VIII Богдановмыт кубок эртаралтын. Таҥасымашым Михаил Богданов эртара. Тудо спорт ориентирований да туризм дене йоча-влакым тренироватла. Тушко 40 участник ушнен, тыгак вич еш таҥасен. Ӱдыр-шамыч коклаште Мария абсолютный чемпион лийын.
– Ты мероприятийыш кок-кум ий ончыч миенам. Тунам шке ийготан-влак коклаште икымше верым налынам. Тений абсолютный чемпион лияш шонымаш дене толынам. Тидлан шке гыч ямдылалтынам. Ондак мыланна чипым (электрон отметкым) пуэныт. Тудо контрольный пунктым налме нерген компьютерыш уверым колта. Старт деч ик минут ончыч картым кучыктеныт. Мый кушто мо верлана, могайрак маршрут дене каяш тӱҥалам – ончен лектынам. 30 минут жапыште 10 контрольный пунктышто лийман ыле. Мый тиде сомылым 25 минутышто шуктенам, – ойла М.Харитонова.
Мария вольыкымат йӧрата. Тудлан пырыс, пий дене шогылташ келша. Чӱчкыдын йолташыжын Буцифал лӱман имньыштым кушкыжын кудалыштеш.
Дарья Быкова.
М.Харитонован альбомжо гыч налме фото.