Морко кундемысе Кугу Кожлаялыште 4 ноябрьыште самырык тукымлан пневматический оружий гыч лӱйкалыме шотышто таҥасымаш лийын. Тушко 12 участник ушнен: Кугу Кожлаял, Изи Кожлаял, Чишкан ял, тыгак Озаҥ ола гыч коча-ковашт деке канышлан унала толшо икшыве-влак.
10-14 да 15-17 ийготан ӱдыр-рвезе-влак коклаште сеҥышым палемдыме. Икымше тӱшкаште Ярослав Эргубаев ойыртемалтын. 2-шо вер дене Анастасия Тимофеева палемдалтын. Нуно коктынат Кугу Кожлаял гыч улыт. А 3-шо верым Изи Кожлаял гыч Богдан Салимгужинов налын.
Вес тӱшкаште сеҥышыш Камилла Николаева лектын. 2-шо верым Андрей Николаев налын. Иза-шӱжар Кугу Кожлаял гыч улыт. А 3-шо вер дене Чишкан ял гыч Валериян Андриянов палемдалтын.
Чыла сеҥыше-влаклан чап кагазым, медальым да изирак пӧлекым кучыктенна. Ик ӱдыр-рвезат пӧлек деч посна кодын огыл. Таҥасымаш деч вара чылам шере когыльо да торт дене чайым йӱктымӧ. Пеш кугу тау ӱстелтӧрым поген ямдылыше Э.А.Петровалан. Кече йӱран лийын гынат, кушкын шогышо тукымлан пӧлеклалтше кугу таҥасымашнам рӱж эртарен колташ чыла йӧным ыштенна. Йоча-влакын чоныштышт поснак сай шарнымаш кодын. Тыгай таҥасымашым йӱлаш пурташ кутырен келшенна.
Тек ончыкыжымат Кугу Кожлаял кундемыште илыше калык келшен ила да самырык тукым коклаште патриотизм шӱлышым шарен шога.
Альберт Багаев, Кугу Кожлаялын старостыже, Пашан ветеранже.
Снимкыште: Таҥасымаш годым.