Сымыктышын тӱрлӧ направленийыштыже пашам ыштыше творческий еҥ ий гыч ийыш опытым пога. Усталык ешаралтме дене калыкат тудын пашажым ончен куанаш тӱҥалеш. Тыгак ойлаш лиеш Йошкар-Олаште шочын-кушшо да кызыт Э.Сапаев лӱмеш опер да балет театрыште пашам ыштыше артистке Любовь Добрынина нергенат.
Тыматле койышан, ошалге чурийвылышан самырык ӱдырамашын сценыште кугурак ийготан чыган ӱдырамашым, Карменым, ончыктен кертмыжлан вигак от ӱшане. Но сценыште тудым ужмек, вий-куатшым шижат. А тидыже артисткын шке сомылжым моткоч устан шуктымыж нерген ойла.
Л.Добрынина Озаҥыште шке ешыж дене ила. Пашашке Йошкар-Олашке кудалыштеш. 14 февральыште театрыште черетан «Кармен» (Ж.Бизе) опер ыле. Тылеч ончыч мый Люба дене вашлийын кутырышым. Мут – Л.Добрыниналан.
Музыкышто — ача-авалан кӧра
— Ачам, Владимир Дмитриевич Добрынин, ӱмыржӧ мучко Сапаев лӱмеш опер да балет театрыште хорышто мурен. Тудын йӱкшӧ — драматический тенор. Изиэм годым шонкалыме, кутырымо, книга гоч тунемме, шке пашам лончылымо элитарный сымыктыш мыйынлык огыл шоненам. Ачам мыйым театрыш коштыктен, тунам балетым ончаш йӧратенам. Йоча-шамычлан шындыме «Ритмы мистики» спектакль келшен шинчын ыле. Кажне гана ачам деч кунам тудо лиеш манын йодынам.
Варажым Йошкар-Оласе музыкальный училищыш тунемаш пурымеке, театрыште кулисе шеҥгелсе илышым онченам: артист-влакын гримым ыштымыштым, выступатлаш ямдылалтмыштым эскеренам. Ачам самырык жапше, консерваторийыште тунеммыж нерген шуко каласкален. Тылеч вара мылам ты сомыл моткоч оҥайын чучаш тӱҥалын.
Ачам телевизор гыч концерт-влакым южгунам возен налын. Сандене кумдан палыме оперный мурызо-влакым, могай йӱк улмым паленам. Пайрем годым ешыште чыланат мураш йӧратенна. Мыланем «Октава» фортепианом налын пуэныт. Ачам южгунам шоктен, мыйым туныктен.
Икана, шарнем, ковам (авамын аваже) мылам «У церкви стояла карета» мурым туныктен да ешна ончылно, пӱкеныш шогалын, мурыктен.
А Чайковский лӱмеш музыкальный школыш авам Алевтина Леонидовна пуэн. Ачамже тыгодым «Йочалан молан музык кӱлеш?» манын. Но авам профессийже дене инженер лийын гынат, сымыктышым йӧратен. Мыят, варажым Мария шӱжаремат музык дене шинчымашым налынна. Шӱжарем кызыт Чувашийысе опер да балет театрыште пашам ышта, хорышто мура. Тудо мый дечем шым ийлан изирак.
Музыкальный школышто «Фортепиано» специальностьым налынам, а училищыште дирижёрско-хоровой отделенийыш пуренам. Тунам Александра Гинзбургын туныктымо хорышкыжо уло кумылын коштынам. Общий вокалым туныктышо Владимир Ромашкин оперыште мураш йӱкем келшыше манын, мыйым Фаина Ефимовна Олейникова деке наҥгаен. Училищыш оперный мурызо, землячкына Галина Трофимовна Ластовка мастер-классым ончыкташ толын ыле. Тунам мурен ончыктенам, туддеч вокалистлан тунемаш пурен кертам мо манын йодынам. Тыге мый, дирижёрлан тунемше студентке, мураш кумылаҥым да Озаҥысе консерваторийыш солист-вокалистлан тунемаш пурышым.
Дуняша, Ольга…
— Озаҥ консерваторийыште тунеммем годым ме оперный классыште тӱрлӧ партий-влакым тунемынна. Римский-Корсаковын «Царская невеста» оперыштыже Дуняша партийым тунем шуктымекем, консерваторийышкына Санкт-Петербург гыч ты партийым мураш ӱжмаш толын. Тушто тӱрлӧ консерваторийлаште тунемше студент ден выпускник-влакым иктыш чумырен, «Дебют» программе почеш оперым шынденыт. Санкт-Петербургышто мыят выступатленам. Тунам кумшо курсышто тунемынам. Пашаш толмеке, икымше пашам лач Дуняша лийын. Тылеч посна варажым ты оперыште Любашан партийжымат муренам.
Тунемме годымак консерваторийыште Римский-Корсаковынак «Снегурочка» оперыштыже Лельын партийже дене выступатленам.
Варажым Йошкар-Олашке опер да балет театрыш меццо-сопрано йӱкан мурызо кӱлмым пален налынам. Мыйым ӱжыныт да пашаш налыныт. Ты театрыште икымше ролем — Чайковскийын «Евгений Онегин» оперыштыже Ольга. Тудым 4-ше курсышто тунемме годсек мурем. Теве шукерте огыл, декабрьыште, угыч ты партий дене, лу ий эртымеке, выступатленам. Консерваторийым пытарымек, вес вере ӱжыныт гынат, мый Йошкар-Оласе театрым ойырен налынам. Ты жаплан ачам илыш гыч каен ыле, авам шкетын кодын. Мый пашаш пуренам да тыгодымак Озаҥ консерваторийысе аспирантурышто тунемынам. Эн ончыч «Царская невеста» опер Чарла кремльыште шындалте. Дуняша роль изи, но тыгодымак сценыште вигак тудым почын пуэн шуктыман. Вара Мусоргскийын «Борис Годуновышто» Марина Мнишекын рольжым пуышт.
Образ шуко
— Кармен рольышто шке усталыкем да вийым ик вере поген, опер мучко тудым кучылтын моштыман. Ты партийым мураш манын, йӱкемым кугемдыме да иземдыме шотышто шканем шеледен каем. Ты паша деч вара вес изирак партий-влакым умылаш куштылгырак.
Сценыш лекме деч ончыч арня але кок арня ямдылалтман. Мурызо улат гын, спорт семынак эре заниматлыман. Тӱҥалтыш гыч мучаш марте сценыште чаткан мураш манын, вокалистке кочкын да мален темшаш, моло сомылымат шуктышаш.
Шуко образым чоҥаш логалеш. Тыгодым героиня-влак мыйын гайрак улыт манын ом керт. Ольга гай эре весела лияш ок лий. Но кӱлеш гын, сценыште тидым ончыктем. Кудалтен кодымо Любаша семын илашат неле, кеч-могай йӧн дене йӧратымашым пӧртылтынеже, тыгайже илышыште ынжат лий шонем. Кармен семынат койын ом керт. Тудын гай койыш-шоктышан шочаш кӱлеш. Вокал полшымо дене мый нине партий-влакым мураш эре ямде улам. Образыш пураш ятыр жап кӱлеш, моло шӱдыр-влакын выступленийыштым ончем. Мутат уке, южгунам шукырак мурымо шуэш. Английыште теве классический сынан Карменым ончыктышна. Кече коден, ты образым кычалаш да йӱк денат тудым ончыкташ нелырак улмаш.
Ачам дене мутланымына годым икана мыланем кагазеш тыге возен пуэн: «Не сдаваться! Не отступать! Только вперёд к победе! С богом. Твой папа». Нине шомак-влак илыш девизем улыт манынат кертам. Ты кагазым, скотч дене клеитлен, пеленем коштыктем.
Любовь Добрынина кызыт 15 партийым мура. Ик эн сай партнёржылан Чебоксар гыч толшо мурызо Дмитрий Сёмкиным шотла. Ешыштат тудын пашажым умылат. Чӱчкыдынак Александр пелашыж дене (тудо финансист) Любан выступленийжым лончылат, мӧҥгыштӧ оперым колыштыт. Тудо пелашыжлан оперыште мо нерген ойлалтме нерген умылтара. Вич ияш ӱдыржат аважын выступленийжым ончаш йӧрата. «Кармен» оперымат вер гыч тарваныде ончен шинчен. Актрисын мурымо моло героиняже-влакымат ӱдыржӧ пален кушкеш. Ӱдырлан тидыже моткочак келша, сандене тудлан ончыкыжым музыкальный шинчымашым пуаш шонат.
Эльвира Терентьева.