Пашаш але иктаж пайремыш, вашлиймашыш кайыме годым кажнына духим шӱралтена. Тудын пушыжо тӱрлӧ. Кузе ойырен налаш?
Тидым Кужэҥер район Кугу Лаждӱрын шочшыжо, аромастилист (духим чын, кӱлеш семын кучылтын мошташ полшышо специалист) Т.Э.Соколова умылтара.
– Татьяна Эриковна, тыгай сатум ойырен налме годым мом шотыш налман?
– Парфюмерийым ужалыме пӧлкашке пурымо годым вигак тӱрлӧ духин варналтше пушыжым шижат. Икмыняр жап келшыше сатум ойыраш тыршымек, нерӱпш лугалтме гае лиеш, начарештеш. Налаш мийыме духин пушыжым сайынрак шижаш манын, тиде кечын шадыргым, кочым, шинчаланым кочман огыл. Изи атыш вӱдым налаш да подылаш лиеш.
Духин качествыжлан тӱткышым ойырыман. Коробкаже вошткойшо слюда дене петырыме да штрих кодан лийшаш. Флакон пундашыште фирмын знакше шындалтшаш. Налме сатун лӱмжӧ чын возалтшаш.
– Парфюмын пушыжо илышыште могай рольым модеш?
– Духи – кокымшо вургем, маныт. Тудым налме деч ончыч могай ийготан улмым шотыш налман. Адакшым тӱрлӧ вере лийме годым келшыше пушаным шӱрыман. Вуйлатыше деке кутыраш каяш ямдылалтме кечын «Шанель Шанс», «Дольче Габбана Лайт Блю» келшен толыт. Шкем лӱддымын, пеҥгыдын кучаш полшат. Мутланымаш пайдале лиеш.
Ӱдырамаш коллективыште пеледыш, свежа юж, куштылго пушан «Шанель Тендер», «Ланвин Модерн Принцесс» духи-влакым кучылташ келшен толеш. Икте-весе коклаште нуно весела кумылым ылыжтат.
Нерым чот чыгылтарыше парфюм деч кораҥаш тыршыман да шекланен шӱрыман. Пӱсӧ пушыжо икте-весе коклаште сырымашыш шуктен кертеш. Аллергий черан еҥ-влаклан эҥгекым конден сеҥа. Мый школышто изирак класслаште тунемше-шамыч дене пашам ыштем гын, куштылго, теҥыз пушаным йыгалтем. «Лакоста Пур Фим», «Ланвин Эклат» пеш келшат. Ончылно шкем пеҥгыдын ончыкташ полшат. Ӱшандарыше кыл лектеш.
– Кажне кечылан келшыше духи уло мо?
– Свежа пушаным шыжыктеда гын, воктене шогышо еҥын кумылжым огыда волто. Тыгай тӱшкаш «Эклат», «Лакоста» да молат пурат. Театрыш але вес вере кайыме годымат кучылташ лиеш.
– Духин пушыжым сайынрак шижаш манын, тудым чийыме вургемыш але коваштыш шыжыктыман?
– Вургемыш шӱралташ лиеш. Но вӱр коштмо верыш – кидвургыш але пулвуй шеҥгек – йыгалтет гын, капкылым тарватыме дене пушыжо южышто утларак шижалтеш. Але йӱр йымак шогалме семын вуй ӱмбаке шыжыктыман. Коҥла йымак йыгыман огыл. Пӱжвӱдыш логалмек, йыгыжге пушым лукын кертеш.
– Духи дене мыняр ий пайдаланаш лиеш? Ынже локтылалт манын, кузе тудым чын аралыман?
– Налме парфюмым кум ий кучылташ лиеш, но тудо шке коробкаштыже лийшаш. Сумкаште коштыктыктыман огыл. Рӱзалтме дене качествыже йомеш. Ванный пӧлемлаште шогыкташ ок йӧрӧ. Ӱмыланрак верыште аралыман.
– Шкеже могай духи дене пайдаланеда?
– Духи – айдемын почеркше, автографше, илыш шӱлыш манын кертам. Тачысе саманыште тудо ӱдырамашын пеш тале юзо вийже, полышыжо. Моштен кучылтат гын, лектышыжат куандарыше лиеш.
Эрдене кынелаш, вуйдорыкым помыжалтараш «Том Форд Портофино», «Шанель Тендер» духи-влакым кучылтам. Кастене «Баккара 540» лишыл. Каныш кече годым – «Том Форд Пьяная Вишня» але «Созревшая Вишня». Шошым, пӱртӱс тӱзланыме пагытыште, чолгалыкым ылыжтат.
– Тиде направлений дене тунемаш мо таратен?
– Аромастилист – илышыштем чонлан келшыше эше ик ешартыш профессий. Мӱшкыран улмем годым ик духин пушыжлан аллергий тӱҥалын. Келшыше пушаным муаш тыгай аланыште тыршыше йолташ ӱдырем полшен. Кондымо сатужлан куанен, пайдале ой-каҥашыжым колыштын, тыгай образованийым налаш мыйынат шонымаш шочын. Адакшым дистанционно шинчымашым налаш йӧн улмо уверат келшен. Тыге «Парфюмерная грамотность», «Парфюмерный стилист» онлайн курс-влакым эртенам. Паша моткоч кӱлешан, оҥай да пайдале.
Туныктышо ден аромастилистым шуко икгайлык ваш кылда. Айдемым умылымаште, шинчымашым пуымаште ушен шога. Духим ойыраш толшо еҥлан полышым пуэн кертам гын, шкемынат кумылем кӱза. Тудын дене пырля мыят йывыртем.
– Каласкалымыланда моткоч кугу тау. Пашада умбакыжат еҥ-влакым куандарыже.
Фотом еш альбом гыч налме.