Марий муро аланыште Звенигово район Кожвожмучаш ялеш шочын-кушшо Геннадий Васильевым ондак чӱчкыдын вашлийынна. Шке жапыштыже тудо Кожласола селасе «Союз» вокально-инструментальный группын ик уста мурызыжлан шотлалтын. Тудо пагытыштак творческий корныжо тӱҥалын, калыклан тӱрлӧ мурым пӧлеклен. «Лыве гай модын», «Ныжылге», «Йӧратенам мый тыйым», «Шыже йӱр» да моло мурат кумдан шарленыт.
2010-2020 ийлаште концертлашке шагал годым мураш лектын. Но ондак тӱҥалме пашам тудо кызытат шуя, репертуаржым сылне у муро дене кажне ийын пойдара.
– 1990-ше ийласе пагыт сай шарнымашым коден. Тиде жапыште мый икымше гана мураш тӱҥалынам, клипем-влак войзалтыныт. «Союз» ансамбльыште ме визытын лийынна. 1989 ийыште Йошкар-Олаште эртарыме рок-группо-влакын фестивальыштышт лауреат лӱмым суленна. Тиддеч вара мыйын творческий корнем тӱҥале. Коллектив дене Морко, Звенигово, Волжский районлашке, тыгак Козьмодемьянск олашке концерт дене лектын коштынна. Но 1993 ийыште ансамбль шаланыш.
Красногорский посёлкышто ешем дене илем. Мый Ташнур тӱвыра пӧртыштӧ художественный вуйлатышылан 30 ий тыршенам, ынде кумшо ий Кожласоласе интернат-пӧртыштӧ культорганизаторлан ыштем. Концертыш пешыже лекмаш уке. Но ӱжыт гын, кайыде ом керт. Сергей Карпов дене кылем пеҥгыде. Йошкар-Олаште Пеледыш пайремыште муренам.
Муро – мыйын йӧратыме пашам. Кызытат мурым луктам, шкенан кундем гыч Таисия Смирнова дене дуэт дене мурена. 2020 ийыште «Лӱҥгалтыш», 2021 ийыште «Шарнымаш» муро-влак дене Марий Эл Радион «Идалыкысе муро» конкурсыштыжо сеҥенна. Тений кеҥежым «Порылык» муро шочо. Кызыт эше «Пелашемлан» у мурым радиош пуэнам.
Еҥ-влак йомдарен огытыл, шонем. Мурем-влакым интернетыште колыштыт. «МЭТР» телеканал дене ончыкталтше «Тыланем мый тыланет» передачыште видео-влак улыт.
Юмо вийым пуа гын, мурым эше луктына, калыкым куандараш, ты неле пагытыште чоныштым лыпландараш шонена, – каласыш Г.Васильев.
Марина Богданова.