Моркысо 1-ше номеран школышто тений 528 йоча тунемеш, 22 класс комплект уло. Тӱҥ шотышто чылажат кок класс дене, а 3-шо, 5-ше да 9-ше класслаште – кум класс дене.
Тыште йоча-влакым воспитатлыме шотышто ятыр сомыл шукталтеш. Тидын нерген директорын воспитаний паша шотышто алмаштышыже Н.А.Иванова дене мутланышна. Ты школышто тиде сомылым Надежда Аркадьевна икымше ий шукта, но опытан туныктышо, тылеч ончыч тыгай пашам Моркысо 6-шо номеран школышто ыштен.
– 6 октябрьыште школыштына Дублёр кечым эртарышна. Тышке 16 туныктышо-ветеран толын ыле. Нуно посёлкышто веле огыл, тӱрлӧ ялыште илат. Сандене умбалнырак илыше-влакым автобус дене кондышна да мероприятий деч вара наҥгаен кодышна. Каласыман: тачылан списке почеш 28 ветеранна уло.
Ты кечын вуйлатыме гыч тӱҥалын кӱварым мушмо марте сомылым йоча-влак шуктеныт. Эн ончыч тунемше-шамыч сылне концертым ончыктеныт. Вара урок-шамыч эртаралтыныт.
Йоча-шамычлан Дублёр кече путырак келшен. Тиде мероприятий деч вара у директор, алмаштыше, класс вуйлатыше-влак, туныктышо коллектив дене погынен, иктешлымашым ыштенна. Тунемше-влак могай сомылым сайын шуктымым, могай ситыдымаш ден экшык лиймым палдареныт. Нуно педагогын пашаже неле манмым умыленыт.
Эрдене эрак линейке лийын. Туныктышо-влак посна класс семын шогеныт. Администраций сомылым 11-ше классыште тунемше-влак шуктеныт. Класс вуйлатышылан 9-ше классла гыч йоча-шамыч тыршеныт. Тӱҥалтыш класслам 9-ше да 10-шо класслаште ӱдыр-рвезе-влак туныктеныт. Рашемын: нунын кокла гыч туныктышо корныш кум икшыве шогалаш кумылаҥын, – ойлыш Надежда Аркадьевна.
Ты школышто Дублёр кече, афганец-влак лӱмеш мероприятий да молат йӱлаш пуреныт. А школын могай кугу историйже! Тидын нерген ятыр каласкалаш лиеш. Туныктышо-влак тачысе илышыштымат историйыш возен кодаш тыршат.