Домр дене сайын шокта

Анна Гребнева

«Марий Эл» кугыжаныш ансамбльын оркестрыштыже шуко самырык ӱдыр-рвезе пашам ыштат. Нунын коклаште ик эн самырыкше — 20 ияш Анна Гребнева. Тудо оркестрыште кум ий шокта.

Йошкар-Олаште шочын-кушшо ӱдырын марла мутланен моштымыжо кумылым нöлта, чоным куандара. Вет ондак марла кутырен огыл улмаш. Ачаже –  руш, аваже – марий. Ачаж ден аваже шукертак ойырленыт, сандене ӱдырым аваже шкетын ончен куштен, творческий корнышко шогалтен. 1-9-ше класслаште талантан йоча-влаклан Национальный президентский школышто тунемын. Тыште марий йылме ден литературым туныктымылан кöра тудо йылмым сайын палаш тӱҥалын. «Ешыште, родо-тукым коклаште марла эре мутланаш тыршена»,  ойла ӱдыр.

Национальный президентский школышто ӱдыр усталык шӱлыш дене пойдаралтын, шуко йолташым муын. Тыште профессионально, сайын шокташ тунем шуын. Семӱзгар дене лывырге парняж дене чоныш логалше семым луктын моштен. Тиде школышто тунеммыже ӱдырлан творчество аланыште кушкаш, кӱкшытыш шуаш полшен. Тыге 9-ше класс деч вара 2015 ийыште И.С.Палантай лӱмеш тӱвыра да сымыктыш колледжышке тунемаш пурен.

«Инструменты народного оркестра» пöлкаште тунемам. Домр, фортепиано дене шоктышо специалист лийын лектам. Чылаже 13 ий ты семӱзгар дене шоктем. Туныктышем – Валентина Сергеевна Виноградова.  Тудо Национальный президент школышто веле огыл, тыгак колледжыште домр дене шокташ туныктен. Баян, балалайке дене семым луктын моштем. Кызыт 4-ше курсышто улам. Тений колледжым тунемын пытарем.

Тунемме деч посна тӱрлö конкурслаште участвоватлен. Кодшо ийын Озаҥ олаште «Кубок Поволжья» конкурсышто 3-шо верым налынам. Кок ий ондак Чебоксар олаште «Инструментальная палитра» II всероссийский конкурс-фестивальыште домрым шоктымо дене икымше верым пуэныт. Озаҥ олаште 2016 ийыште семӱзгар дене шоктымо «KAZANMUSIK йорт» I тӱнямбал конкурс ышто 3-шо верым налынам. А 2017 ийыште туштак ик конкурсышто 2-шо вер ыле. Фортепиано дене конкурслаште  участвоватлаш тыршем. Кум ий ончыч Чебоксар олаште фортепиано дене регион-влак кокласе фестиваль-конкурсышко миенам, туштат 2-шо верым пуэныт ыле» — ойла студентке.

Сайын тунеммыжлан Анна Марий Эл Республикым вуйлатыше А.Евстифеевын стипендийжым налеш.  Ӱдыр тунемеш, пашамат ыштен шукта.

«Пырля тунемме йолташ ӱдырем Настя Токтарова дене Марий филармонийышке пашашке пурышна. Коктынат президент школым ик жапыште тунем пытаренна, 13 ий ваш келшен илена. Паша келша. Оркестрыште куштылго, неле партийымат шокташ логалеш. Коллектив сай, пелыже Национальный президент школ-интернатым пытарыше-влак улыт. Тыште пел ставке дене ыштена, сандене арнялан 3 гана пашашке миен толына, йöн лиеш гын, концертым ончыктена. «Марий Эл» ансамбль утларакшым республикысе тӱрлö районлаште выступатла, кугу олалашке гастроль дене кая. Чаманаш логалеш, тунеммылан кöра кужу жаплан ме тыге каен огына керт. Кызыт оркестрыште «Музыка без гарниц» у программым ыштыме», — каласкала ӱдыр.

Тыге Анна эр гыч кас марте тунемеш, пашам ыштен шукта. Йошкар-Оласе «Марий сийгудо» рестораныште арняште 2 кече официанткылан ышта.

Поро ончалтышан, виян койыш-шоктышан ӱдыр кажне кечын мастарлыкшым нöлтен, шуарен толеш. Музыко тудын илышыжым сылнештара.