Йоча пособийым палемдыме годым мобилизоватлыме еҥ-влакын доходышт шотыш ок налалт, палдара Россий Пенсий фондын Марий Эл Республикысе пӧлкаже.
Тыгай правилым правительствын пунчалыштыже пеҥгыдемдыме. Тудын почешак, мобилизоватлыме еҥын нужналыкшым ончымо жаплан доходшо уке гынат, пособий тӱлалтшаш.
Ушештарена: доходым 8-17 ияш йоча-влакын ача-аваштлан да мӱшкыран ӱдырамашлан пособийым палемдыме годым ончат. Тыгай выплатылан права тугай ешын уло, кӧн доходшо илен лекташ ситыше эн изи кугыт деч изирак. Пособийым налаш манын, ача-аван пеҥгыдемдалтше пашадар але тудын укежлан кӱлешан амал лийшаш, а ешын погыжо пеҥгыдемдыме йодмашлан келшен толшаш.
Йочан ачажым военный службыш мобилизаций почеш наҥгаеныт гын, тудын ондакысе пашадарже (тышке премий, предпринимательский доход да молат пурат) нужналыкым шотлымо годым шотыш огыт налалт. Адакшым ондак ешлан мобилизоватлыме еҥын пашадарже укелан кӧра пособийым тӱлаш тореш лийыныт гын, ынде тудын ватыже, пособийым йодын, Пенсионный фондыш уэш каен кертеш.
Мобилизаций почеш военный службыш налме шотышто пеҥгыдемдыше документым пуыман. Пособий ешлан куд тылзылан палемдалтеш. Ты жап эртымеке, Пенсионный фондыш адак йодмашым возыман.