Коронавирус (COVID-19) инфекцийлан кӧра Российын образований да шанче министерствыжын приказше почеш 2020 ий 16 март гыч вузлаште дистанционно туныкташ тӱҥалыныт. Студент ден туныктышо-влак дистанционно тунемме нерген мом шонат?
Елена АНДРИАНОВА, МарГУ, Калыкле тӱвыра да тӱвыра кокласе институтын туныктышыжо, доцент:
– Мый моло семынак «moodle» системе почеш туныктем. Тыште чыла занятийым эртараш йӧн уло. Кеч практике, кеч лекций занятий-влакым пуаш лиеш. Студент-влак дене чатыште мутланена. Теме почеш йодыш-влак лийыт гын, занятий жапыште пуэн кертыт. Занятий-влакым программе почеш эртарена.
Ольга КОШКИНА, Йошкар-Оласе медколледж, 2-шо курс:
– Ме карантиныште 21 март гыч 12 апрель марте улына. Икымше арнян расписаний почеш семинар-влак лийыныт. Медколледжын шке тунемме порталже МарГУ-н гай уке, сандене туныктышо-влак тӱрлӧ йӧн дене мӧҥгысӧ пашам пуат. Кокымшо арнян туныктышо-влак дневник.ру сайтыште тунемме материалым пуаш тӱҥалыныт. Мӧҥгысӧ пашам ыштен, туныктышылан электронный почто дене але соцсетьыш серыш дене колтена. Тунемме жап ончычсо деч чот огеш ойыртемалт. Ме тыгак 8 шагат эр гыч 13 але 15 шагат марте тунемына. Дистанционно тунемаш мылам нелын чучеш, молан манаш гын мый группын старостаже улам. Туныктышо, пырля тунемшевлак иктаж-мом огыт умыло гын, мый декем йыҥгыртат.
Надежда ИМАЕВА, МарГУ, 5-ше курс:
– Тыге тунемме мыланем огеш келше. Ме туныктышым, а тудо мемнам огына уж. Тыгай йӧн дене його але тораште улшо-влаклан гына тунемаш сай. Мемнан «moodle» образовательный портална уло, ондакат тушто заданий-влакым ыштыме, кызытат туштак тунемына. Студент занятийыште улмым туныктышо «онлайн» эскера. Мый финн йылмым туныктышо лияш ямдылалтам, сандене мыланем тиде йӧн дене тунеммылан аудирований занятий огеш сите. Сандене уэш ондакысе семын тунемаш коштмо шуэш.
Татьяна КОКОТКИНА, МарГУ, экономике, управлений да финанс институт, доцент:
—«Онлайн» режим дене туныкташ ямде лийынна. «Moodle» образовательный порталыште ме икмыняр ий пашам ыштена. Кызыт палемдыме жапыште студент-влак порталыш пурат да тушто пашам ыштена. Занятий-влакым видеоконференций але интерактивный лекций семын эртарена. Иктешлыме семын тестым але вес заданийым ышташ пуэна. Тудым палемдыме кече марте ыштен шуктыман, уке гын тетла ыштен от керт, тудо «йомеш».
«Moodle» системыште шуко йӧн уло, но тылеч посна тӱрлӧ мессенджер, соцсетьым, Skype, You Tube площадкым пашалан кучылтына. Мутлан, You Tube каналыш ме видеолекцийым войзен вераҥдена.