8 сентябрьыште Депутат кече эртаралтын. Депутат-влак Марий Кугыжаныш университетын тÿҥ корпусыштыжо погыненыт, общий да кыдалаш профессиональный образованийым уэмден толмо нерген мутланеныт.
Юридический факультетын деканже А.В.Кузьмина университетын да юридический факультетын эртыме корнышт, ты факультетлан негызым пыштыше лÿмлö еҥ ден туныктышо-влакын, тыгак студент-шамычын сеҥымашышт нерген каласкален. Уна-влак актовый да судебный заседаний-влакым эртарыме учебный заллаште лийыныт. Тыгак криминалистике лабораторийым ончал савырненыт.
Депутат-влаклан Марий Эл Республикысе образований да шанче министрын алмаштышыже Н.Б.Антоничева общий да кыдалаш профессионал образованийым кызытсе илышлан келыштарыме, «Образований» национальный проектын Марий Элыште кузе шукталтмыже, у школ ден йочасад-влак, республикысе образований сферыште лийше сай вашталтыш да эше рашемдаш кÿлшö йодыш-шамыч дене палдарен, зал гыч йоҥгышо ятыр йодышлан вашештен.
Мероприятий годым Кугыжаныш Погынын Председательже А.В.Смирнов парламентын у депутатше С.З.Фирсовлан Кугыжаныш Погынын депутатше знакым кучыктен. Тыгак Марий кугыжаныш университетын ректоржо М.Н.Швецовлан да юридический факультетын деканже А.В.Кузьминалан тыгай вашлиймашым эртараш полшымыштлан тауштымашан кагазым пуэн.
Ты кечынак Кугыжаныш Погынын Председательже А.В.Смирнов Марий кугыжаныш университетын ректоржо М.Н.Швецов дене студент-юрист-влакым ямдылымаште, молодёжный парламентаризмым вияҥдымаште да законодательствым саемдыме йодыш-влакым каҥашымаште икте-весылан полшымо шотышто соглашенийым подписатленыт. Тыгаяк кагазым Айдемын праваже шотышто Марий Эл республикын уполномоченный Ф.Х.Мухаметгалиев дене подписатлыме. Тиде документ айдемын праваже дене кылдалтше федеральный да республиканский законодательствым уэмдыме йодыш шотышто пырля пашам ышташ кутырен келшыме нерген палдара.
А.В.Смирнов сар ветеран-влаклан клинический госпитальыште тÿҥ врачлан тыршымыж годым марий вуз пелен медицине факультетым почмашке кугу надрым пыштен. Тений медицине факультетын икымше выпускшо лийын. Депутат кечын МарГУ-н ректоржо М.Швецов Кугыжаныш погынын председательжылан тауштен да «Опора республики» премийым сеҥен налме дипломым кучыктен.