Таче Йошкар-Олаште Кугыжаныш Погынын депутатше-влакын черетан шымше сессийышт эртен.
Марий Элын икмыняр законышкыжо вашталтыш пурталтын. Иктыже – республикын бюджетше пойдаралтме да роскот ужаш ешаралтме дене кылдалтын. 2020, тыгак 2021-2023 ийлан казнашке налог окса утларак пурышаш. Парыш 680,0 млн теҥгелан ешаралтшаш, а роскот кок пачаш — 1530,0 млн теҥгелан кугемшаш, бюджетыште дефицит 850,0 млн. теҥгеш погына.
Вес законыш вашталтышым пуртымо дене никотин улман кеч-могай сатум (ончыч снюс да моло тыгайлан шотлалтын огыл) ийготыш шудымо йочалан ужалаш чарыме.
Моло вашталтыш-влак налог, образований, мланде отношений дене кылдалтше лийыныт.
Депутат-влак ончылно Марий Эл МВД-н, Шотлышо палатын вуйлатышышт 2019 ийыште ыштыме пашам иктешленыт. Тыгак Кугыжаныш Погынын шымше созывшын ӱмаште шыжымсе сайлымаш деч вара таче кече марте ыштыме пашаже шотышто Марий парламентын спикерже А.Смирнов каласкален.
Сессийштак 32-шо судебный участкын Морко районысо мировой судьялан Е.Рыбаковам пеҥгыдемденыт.
Фотом Кугыжаныш Погынын сайтше гыч налме.